"Aqldan ozgan Maks" uslubidagi shafqatsiz yoʻltanlamaslari bilan tanilgan Rezvani kompaniyasi oʻzining yangi mahsuloti — Rezvani Fortress deb nomlangan gʻildirakli qal’asini namoyish etdi. Yangilik kuchli Ford F-150 Raptor bazasida qurilgan boʻlsa-da, tashqi koʻrinishidan buni mutlaqo sezib boʻlmaydi. Avtomobil eksteryerida zavod modelidan birorta ham original detal qolmagan, uning oʻrnini qirrali va futuristik dizayn egallagan. Bu haqda Ixbt.com xabar beradi.
Avtomobil uchun deyarli har qanday yoʻlsizlikni yengib oʻtishga imkon beruvchi ulkan 40 dyuymli shinalar mavjud. Kuchaytirilgan Fox osmasi va toʻliq uzatmali tizim bazaviy komplektatsiyaga kiritilgan. Biroq Rezvani Fortress modelining asosiy ustunligi uning himoya funksiyalaridadir. Mashina harbiy zirhli panellar, oʻq oʻtmaydigan oynalar, tutun pardasi hosil qilish tizimi va barcha elektronikani ishdan chiqarishi mumkin boʻlgan elektromagnit impulsidan (EMI) himoya bilan jihozlangan.
Pikapning bazaviy talqinida Ford F-150 Raptor modelidan olingan standart V6 qoʻsh turbo dvigateli oʻrnatilgan. Koʻproq quvvatni xohlovchilar uchun Rezvani 850 ot kuchiga ega boʻlgan 5,2 litrli V8 dvigatelini taklif etmoqda. Shuningdek, xavfsizlik paketiga qalampir gazi purkagichi, elektrlashtirilgan eshik tutqichlari va tungi koʻrish tizimi kabi ekstremal opsiyalar ham kiritilgan.
Qattiqqoʻl tashqi koʻrinishiga qaramay, Fortress ichki qismi spartancha bunkerga oʻxshamaydi. Rezvani muhandislari original Raptor qulayligini, jumladan, old panel arxitekturasi va multimedia ekranlarini saqlab qolgan holda, unga premium darajadagi oʻzgarishlarni qoʻshishgan. Mijozlarga oʻrindiqlarni bezash uchun 10 xil uslub va rang tanlovi taqdim etiladi. Rezvani Fortress modelining boshlangʻich narxi 285 000 dollarni tashkil etadi.
“Zamin”ni Telegramʻda oʻqing!
