AQSH Rossiyaning Ukrainadagi harbiy jinoyatlariga oid dalillarni to‘playdi

^{Foto: AP}
AQSH davlat departamenti Rossiya tomonidan Ukrainada sodir etilgan harbiy jinoyatlarga oid dalillarni to‘plash va tahlil qilish uchun platforma yaratmoqda.

AQSH davlat departamenti Rossiyaning Ukrainadagi harbiy jinoyatlarini tergov qilish, hujjatlashtirish va e’lon qilish uchun yangi bo‘lim tashkil etilganini e’lon qildi. Mojarolarni kuzatish markazi «Rossiyaning Ukrainadagi harbiy jinoyatlari va boshqa vahshiyliklariga oid dalillarni to‘playdi, tahlil qiladi va keng ommaga taqdim etadi», deyiladi idoraning 17 may, seshanba kuni e’lon qilingan bayonotida.

Bo‘lim fuqarolik va jinoiy sud ishlarida foydalanish uchun jamoat va tijorat manbalaridan ma’lumotlarni, shu jumladan ijtimoiy tarmoqlar va tijorat sun’iy yo‘ldosh tasvirlari ma’lumotlarini to‘playdi. Observatoriya homiyligida «Rossiyaning noto‘g‘ri ma’lumot berish va huquqbuzarliklarni yoritishga qaratilgan sa’y-harakatlariga» qarshi sayt yaratiladi, deyiladi AQSH davlat departamenti bayonotida.

Bo‘lim tarkibiga Davlat departamenti, Esri xaritalash dasturiy ta’minoti kompaniyasi, Yel universitetining gumanitar fanlar tadqiqot laboratoriyasi; Smitson madaniy qutqaruv tashabbusi va sun’iy intellektga asoslangan tahlilni sun’iy yo‘ldosh tasvirlari va boshqa ma’lumotlar bilan birlashtirgan PlanetScape Ai kiradi.

Ukrainaning o‘zi ham hududida sodir etilgan davlat sifatida Rossiyaning ehtimoliy harbiy jinoyatlarini tergov qilmoqda. Sumi viloyatining 62 yoshli fuqarosini o‘ldirishda ayblanayotgan rossiyalik harbiyga qarshi birinchi ish may oyi boshida sudga yuborilgan.

Bundan tashqari, Yevropa ittifoqining 10 dan ortiq davlatlari, jumladan, Germaniya, Fransiya, Estoniya, Litva va Polshada o‘z tekshiruvlarini boshladi. Haagadagi Xalqaro jinoiy sudi (XJS) butun global darajada tergov o‘tkazmoqda. U urush jinoyatlari, insoniyatga qarshi jinoyatlar va genotsidlarga nisbatan yurisdiksiyaga ega. 17 may kuni XJS bosh prokurori Karim Xon organ yurisdiksiyasidagi jinoyatlarni tergov qilish uchun 42 nafar tergovchi, sud-tibbiyot ekspertlari va yordamchi xodimlardan iborat guruhni Ukrainaga yuborganini ma’lum qildi.

Xalqaro kuzatuvchilar, jurnalistlar, tashkilotlar va davlatlar bir necha bor Rossiya kuchlari Ukrainaga bostirib kirganidan keyin jiddiy harbiy jinoyatlar sodir etganiga oid ko‘plab dalillarga ishora qilgan. Xususan, YEXHT ma’lumotlariga ko‘ra, qiynoqlar va shafqatsiz munosabatda bo‘lish, shuningdek, tinch aholini o‘ldirish va o‘g‘irlab ketish holatlari haqida «ishonchli dalillar» mavjud. Ommaviy jinoyatlarning eng jiddiy joyi Kiyev yaqinidagi Bucha shahri bo‘lib, u yerda Rossiya qo‘shinlari olib chiqib ketilgandan so‘ng, yuzlab halok bo‘lgan tinch aholining jasadlari topilgan. “Zamin” yangiliklarini “Facebook”da kuzatib boring