16:30 / 26.05.2022

Urushning 91-kuni: Donbassda yana bir shahar bosib olindi. Kiyev minalardan tozalanmoqda (foto)

Urushning to‘qson birinchi kunida Checheniston rahbari Ramzan Qodirov rus qo‘shinlari Lisichanskga kirishga muvaffaq bo‘lganini aytdi.

Lugansk viloyati ma’muriyati rahbari Sergey Gaydayning so‘zlariga ko‘ra, mintaqa hududining atigi 5 foizi Ukraina nazoratida qolmoqda.

Ukraina prezidenti Vladimir Zelenskiy rossiyaliklar uchun viza rejimini joriy etish g‘oyasini qo‘llab-quvvatladi (Rossiya va Ukraina o‘rtasida vizasiz rejim amal qilib kelayotgan edi).

Rossiyaparast kuchlar nazoratidagi Zaporoje viloyatida aholiga Rossiya pasportlarini berishni boshlash kutilmoqda. Vladimir Putin esa urush boshlanganidan beri birinchi marta yarador rus harbiylarini ko‘rish uchun kasalxonaga tashrif buyurdi.

Meduza 25 may suratlarini jamladi.

Donbass shimoli

^{Rossiyaparast askarlar Ukraina qurolli kuchlarining Svetlodarsk shahri (Donetsk viloyati) yaqinidagi sobiq jangovar pozitsiyasida. Rossiya qo‘shinlari 24 may kuni ertalab Svetlodarskni egallab oldi. Ukraina rasmiylariga ko‘ra, 10 mingga yaqin odam okkupatsiya ostida qolgan.
Foto: Reuters}

^{Svetlodarskdagi rossiyaparast harbiylar.
Foto: Reuters}

^{Pokrovsk temir yo‘l stansiyasiga qilingan raketa hujumining izi. Evakuatsiya poyezdlari shahardan Ukraina g‘arbiga yo‘l olmoqda.
Foto: Reuters}

^{Kramatorskda raketa hujumi oqibatida vayron bo‘lgan bino oldida o‘tirgan bola. Shahar meri Aleksandr Goncharenkoning so‘zlariga ko‘ra, 25 may kuni rus qo‘shinlari uyqudagi aholi punkti va xususiy sektorni o‘qqa tutgan.
Foto: AFP}

^{Pokrovskka qilingan hujumda yaralangan tinch aholi vakili. 25 may kuni shaharga ikkita raketa hujumi uyushtirildi. Dontesk harbiy boshqarmasi boshlig‘i Pavel Kirilenkoning so‘zlariga ko‘ra, to‘rt nafar tinch fuqaro jarohatlangan.
Foto: AP Photo}
Xarkov viloyati

^{Xarkov yaqinidagi qishloqda artilleriya o‘qlaridan yashirinishga urinayotgan ayol.
Foto: AFP}

^{Olxovkadagi qabriston. Qishloq urush boshida rus harbiylari tomonidan bosib olingan va aprel oyida ozod qilingan. Urush boshlanganidan beri Xarkov viloyatida jami 700 dan ortiq tinch aholi halok bo‘ldi, dedi viloyat politsiyasi tergov boshqarmasi boshlig‘i Sergey Bolvinov.
Foto: Reuters}
Kiyev viloyati

^{Pirotexniklar Kiyevdagi botanika bog‘i hududini ko‘zdan kechirmoqda. Hozir shaharda jangovar harakatlar olib borilgan yoki snaryadlar tushgan hududlarni minalardan tozalash ishlari ketmoqda.
Foto: «KMDA»}