Shvetsiya Ukrainaga raketalar va tankka qarshi qurollar yuboradi

^{Ukrainalik harbiy xizmatchilar Shvetsiyaning portativ qurol tizimidan foydalanishni o‘rganmoqda.
Foto: AP Photo}
Shvetsiya Ukrainaga kemaga qarshi raketalar, tankka qarshi qurollar va 12,7 millimetrli miltiqlarni, shu jumladan o‘q-dorilarni yetkazib beradi. Bu haqda Shvetsiya TIV rahbari Enn Lindega tayanib, «RBK» xabar berdi.

«Ushbu to‘rtinchi paket Ukraina Qurolli kuchlariga moliyaviy yordamni ham o‘z ichiga oladi. Umumiy summa 95 million yevrodan oshadi», — dedi u.

Mart oyida Linde Ukrainaga himoya vositalari, dronlar va durbinlar yuborilishini e’lon qilgandi. Keyinroq u Shvetsiya tomoni Kiyevga 5000 ta tankka qarshi qurollar va minalardan tozalash uskunalarini topshirishini ma’lum qildi. Paket 205 million shved kronasiga baholandi.

Ukraina bir necha bor Qo‘shma Shtatlardan bir qancha raketa tizimlarini topshirishni so‘ragan, o‘tgan hafta The New York Times AQSH ushbu talabni bajarish niyatida ekanini xabar qildi.

AQSH prezidenti Jo Baydenning so‘zlariga ko‘ra, Vashington yuboradigan raketa tizimlari Rossiya hududiga yetib bora olmaydi. Davlat kotibi Entoni Blinkenning qayd etishicha, Ukraina AQSHni qurollardan Rossiya hududiga zarba berishda foydalanmaslikka ishontirgan. Reuters agentligi AQSH ma’muriyatining yuqori martabali vakiliga tayanib, Ukraina AQSHdan M142 HIMARS (High Mobility Artillery Rocket System) qurollarini olishini ma’lum qildi.

Kreml Ukrainaga qurol yetkazib berish qit’a xavfsizligiga tahdid solishi va beqarorlikka olib kelishini bir necha bor ta’kidlagan. 2 iyun kuni Rossiya prezidenti matbuot kotibi Dmitriy Peskov Ukrainaga qurol-aslaha kiritilishi uni «yanada ko‘proq azob-uqubatlarga» solishini aytdi. “Zamin” yangiliklarini “Odnoklassniki”da kuzatib boring