Ramzan Qodirov Ukrainadagi ustuvor vazifasi nimaligini aytdi

^{Foto: «RIA Novosti»}
Checheniston rahbari Ramzan Qodirov Ukrainadagi «maxsus operatsiya» davomida Chechenistondan qochib kelgan terrorchilarni yoʻq qilishni oʻzining ustuvor vazifasi deb atadi.

Qodirovning soʻzlariga koʻra, ittifoqchi kuchlar LXRning butun hududini ozod qilganiga qaramay, chechenlar uchun maxsus operatsiya hali ham «nihoyasiga etmagan».

«Biz uchun asosiy masala Checheniston Respublikasida tartibsizliklar koʻtargan shaytonlar bilan hisob-kitob qilishdir. Biz ularni uzoq vaqtdan beri qidiryapmiz. Ular rasman terrorchilar deb tan olingan. Checheniston Respublikasida odamlar oʻgʻirlab ketilgan, tinch aholi oʻldirilgan va mayib qilingan», — deb yozdi u Telegram’da.

Checheniston rahbarining ta'kidlashicha, maxsus operatsiya boshidanoq u aynan ushbu terrorchilarning qaerdaligini aniqlashga alohida urgʻu bergan. U Rossiya prezidenti Vladimir Putin jangarilarni yoʻq qilishga buyruq berishiga va bu vazifani bajarish uchun chechen boʻlinmasini yuborishiga umid bildirdi.

Rossiya Mudofaa vaziri Sergey Shoygu 3 iyul kuni Vladimir Putinga Rossiya kuchlari Lisichanskni nazoratga olgani haqida hisobot berdi, bu Lugansk viloyatidagi Ukraina Qurolli kuchlari nazorati ostida qolgan oxirgi yirik shahar edi.

Putin Lugansk yoʻnalishidagi jangovar harakatlar ishtirokchilari dam olishini va «jangovar qobiliyatlarini oshirishni» buyurdi.

7 iyul kuni Qodirov Ukrainadagi jangovar harakatlarda qatnashgan «Axmat» maxsus boʻlinmasi askarlari LXR nazoratini oʻz qoʻliga olganidan soʻng uylariga qaytganini ma'lum qildi.

Checheniston rahbari xizmat koʻrsatgan harbiylarni mukofotladi. Ulardan uch nafari ikkinchi darajali «Vatanga xizmatlari uchun» ordeni, bir jangchi «Jasorat uchun» medali bilan taqdirlandi. Yana etti kishi Checheniston Respublikasining oliy mukofoti – Axmat Qodirov nomidagi ordeni bilan taqdirlandi. “Zamin” yangiliklarini “Telegram”da kuzatib boring