Zelenskiy Rossiyaning Ukrainada referendum o‘tkazishi qanday oqibatlarga olib kelishini aytgandi. Kreml uning so‘zlariga javob qaytardi

Vladimir Zelenskiy Rossiyaning Ukraina hududida referendum o‘tkazishi qanday oqibatlarga olib kelishi haqida o‘z videomurojaatida aytib o‘tgandi. Rossiya prezidenti matbuot kotibi Dmitriy Peskov Zelenskiyning so‘zlariga javob qaytardi.

Ma’lumotlarga ko‘ra, Peskov ayni vaqtda Rossiya nazoratida bo‘lgan hududlardagi Ukraina fuqarolariga referendum masalasida murojaat yo‘llash kerakligi, bu ularning xohishi ekanini aytgan.

- Gap shundaki, Ukrainadagi aholining o‘zida bunday rejalar bor. Referendum o‘tkazmoqchi bo‘layotganlar biz emas. Bu yerda Zelenskiy bayonotini kimga qarata aytayotganini aniqlab olishi kerak: nomi tilga olingan hududlardagi Ukraina fuqarolarigami yoki Rossiya fuqarolariga. Agar bizning fuqarolar va rahbariyat bo‘lsa, demak, bu holatda Rossiya — noto‘g‘ri manzil, — deydi Peskov.

Uning qo‘shimcha qilishicha, Zelenskiy o‘z fuqarolariga murojaat qilib, ulardan nega mamlakatda yashashni istamaydiganlar soni ko‘pligini so‘rashi kerak.

Ma’lumot uchun, Zelenskiy o‘zining Telegram-kanalida e’lon qilgan videomurojaatida Rossiya Qurolli kuchlari tomonidan egallangan janubiy viloyatlarda referendum o‘tkazish Rossiyaning Ukraina va erkin dunyo bilan muzokara olib borishda barcha imkoniyatlar yo‘qotilishini anglatishini aytgandi. “Zamin” yangiliklarini “Telegram”da kuzatib boring