Ramzan Qodirov Delimxanov boshchiligidagi «sara jangchilar» frontga qaytganini ma'lum qildi

^{Foto: Videodan skrinshot}
Rossiyaning Checheniston respublikasi rahbari Ramzan Qodirov rus askarlari Xarkivdagi Izyum, Kupyansk va Balakliyani tashlab qochgani fonida mamlakat Mudofaa vazirligini tanqid qildi. Qodirov bu borada oʻz kanalida audioxabar e'lon qildi.

«Men Mudofaa vazirligi kabi strateg emasman, doim haqiqatni gapiraman: xatolarga yoʻl qoʻyildi, umid qilaman, ular bundan xulosa chiqarishadi. Agar bugun-erta oʻzgarish boʻlmasa, men Mudofaa vazirligi va mamlakat rahbariyatiga aloqaga chiqib, ularga vaziyatni tushuntirishga majbur boʻlaman. Vaziyat juda qiziqarli va hayratlanarli», deydi Checheniston rahbari.

Qodirov harbiylar «shaharni topshirishi»da hech kimni ayblay olmasligi, chunki Mudofaa vazirligi siyosatini tushunmasligini aytgan. Uning soʻzlariga koʻra, vazirlik rasmiylari ukrainaliklarning hujumini koʻrib turgan boʻlsa-da, bu borada hech nima demagan.

«Nega bunday qilindi? Nega [shahar] topshirildi? Bu ishlar nega qilingani tushuntirilishi kerak. Rossiya xohlaganda bir qadam ham ortga qadam tashlamasdi. Bu uchun ularda alohida odamlar tayyorlanmagan edi. Biz doim qanday otayotganimiz, qanday olayotganimiz, qanday yoʻq qilayotganimizni koʻrsatamiz. Boshqa tomonni ham koʻrsatish kerak», deydi u.

Qodirovning soʻzlariga koʻra, Rossiya askarlari shaharlar va qishloqlarni «topshirayotgani»ning yaxshi tomoni ham bor. Chunki Ukrainaga «Axmat» polki maxsus kuchlarining uchta bataloni yuborilgan. Ular Ukraina hududida «maxsus harbiy amaliyot» (Rossiyada urushni shunday atashadi) oʻtkazadi.

«Men, Ramzan Qodirov, rasman ma'lum qilamanki, bu barcha shaharlar qaytib olinadi. U erda allaqachon bizning yigitlar, bu ish uchun tayyorlangan yigitlarimiz borishgan. Yana 10 ming jangchilar borishga tayyor. Va biz kelajakda Odessagacha boramiz», degan Qodirov.

12 sentyabr kuni Ramzan Qodirov oʻzining Telegram-kanalida yana bir necha videolar joyladi. Ulardan birida Rossiya Dumasi deputati Adam Delimxanov boshchilik chechen harbiylari Ukrainada boʻlib turgani aytilgan murojaat aks etgan. Videoda deputat Delimxanov Xersonda ekani, chechen askarlari Ukrainani «natsizmdan tozalash»ga tayyorligini aytadi. Uning soʻzlariga koʻra, 10 ming nafar chechenistonlik harbiylar Zaporijjya, Xerson va «DXR»ga borgan.

«Xarkivdagi ba'zi shaharlar natsistlar, shaytonlar tomonidan egallangan. Biz sizlarga Mariupolda boʻlgani kabi koʻrsatib qoʻyamiz. Shunday ekan, bizdan syurprizlar kutib qoling. Biz butun front boʻylab harakat qilib, Ukrainani ozod qilamiz», degan Delimxanov.

Qodirov videoga izoh ham yozib qoldirgan. Uning aytishicha, deputat Delimxanov boshchiligidagi «elit jangchilar»ga Ukrainaning Mariupol, Severodonetsk, Lisichansk va Popasnaya shaharlari «ozod qilingani»dan soʻng Putin tomonidan ta'til berilgandi. Endi esa ular yana frontga qaytgan.

Avvalroq Ramzan Qodirov Rossiya Ukrainada «maxsus harbiy amaliyot» olib borayotgani sabab Chechenistondagi hech qaysi kuch ishlatar tizim xodimlari dam olishga haqqi yoʻqligi, bu vaqtda dam olish haqida oʻylab boʻlmasligini aytgan edi. “Zamin” yangiliklarini “Telegram”da kuzatib boring