Peru prezidentiga impichment e'lon qilingach, u politsiya tomonidan qoʻlga olindi

^{Pedro Kastilo
Foto: Zuma}
Peruda prezident Pedro Kastiloga nisbatan parlament tomonidan impichment e'lon qilingach, u politsiya tomonidan qoʻlga olindi. Bu haqda La Vanguardia va El Comercio nashrlari xabar bermoqda.

El Comercio ma'lumotlariga koʻra, kongress Pedro Kastiloni lavozimidan ozod etish haqida qaror qabul qilgach, maxsus yigʻilishda Peru vitse-prezidenti Dina Boluarte respublikaning yangi prezidenti sifatida qasamyod qabul qilgan.

Peru parlamenti 7 dekabr kuni prezidentga nisbatan impichment masalasini uchinchi marta koʻrib chiqishi kerak edi. Undan avvalgi urinishlar esa muvaffaqiyatsizlikka uchragandi. Biroq bundan bir necha soat avval Kastilo murojaat bilan chiqdi.

Kongress Kastiloni korruptsiyaviy jinoyatlarni amalga oshirganlikda aybladi. Prezident oʻz murojaatida ayblovlarni inkor qildi va ularni asossiz deb atadi. Parlamentning bir qismi prezidentning hokimiyatdan agʻdarilishini u lavozimiga kirishganidan buyon «kun tartibida mavjud boʻlgan yagona band» deb hisoblaydi, dedi u.

Kastilo respublika kongressini tarqatib yuborib, mamlakatda komendantlik soatini joriy qildi. Shunga qaramay, kongress mamlakat prezidentini chetlatish haqida qaror qabul qildi. Qaror 101 nafar kongressmen tomonidan qoʻllab-quvvatlandi, u ma'qullanishi uchun esa 87 ta ovoz etarli boʻladi.

RPP radiosi oʻz manbalariga tayanib ma'lum qilishicha, politsiya va harbiylar kongress tomoniga oʻtgan. Prezident bayonotidan keyin politsiya bosh qarorgohida favqulodda yigʻilish boshlangan.

Kastiloning xatti-harakatlarini Boluarte qoralab chiqdi. Adliya vaziri Feliks Shero, iqtisodiyot vaziri Kurt Burneo, tashqi ishlar vaziri Sezar Landa va mehnat vaziri Alexandro Salas va boshqa siyosatchilar iste'fo berdi.

Peru bosh prokuraturasi davlat rahbarini Konstitutsiyani qoʻpol ravishda buzishda aybladi. Idora rahbari Daniel Soria Kastiloga qarshi jinoiy ish qoʻzgʻash bilan tahdid qildi.

Konstitutsiyaviy sud raisi Frantsisko Morales voqealarni toʻntarish deb atadi va kongressni vakolatlarni davlat rahbari Boluartega topshirishga chaqirdi.

Kastilo 2021 yil iyulida Peru prezidenti saylovida gʻolib chiqqan edi. Sobiq qishloq oʻqituvchisi ijtimoiy islohotlar oʻtkazish va mamlakat boyliklarini odilona taqsimlash haqidagi populistik va'dalari bilan aholining eng qashshoq qatlamlarining ovozlarini qoʻlga kiritgandi.

Peru prezidenti Pedro Kastilo Impichment