Foto: Nini Gabritchidze
Tbilisidagi parlament binosi oldida 10 mingga yaqin odam toʻplandi, deb xabar berdi Paper Kartuli. Bu «Xorijiy agentlar» qonuniga qarshi ommaviy norozilik namoyishlarining ikkinchi kuni. Muxbirning xabar berishicha, namoyishchilar olomoni toʻrt kvartalga choʻzilgan, Rustaveli shoh koʻchasi toʻsib qoʻyilgan.
Batumi shahrida ham norozilik aktsiyasi boʻlib oʻtmoqda. Xabarga koʻra, mingga yaqin kishi universitet binosi yonida toʻplangan, ularning aksariyati talabalar.
7 mart kuni Gruziya parlamenti «xorijiy agentlar» haqidagi qonun loyihasini birinchi oʻqishda qabul qildi. Bundan norozi boʻlgan odamlar kechqurun bino yaqinida toʻplandi. Yakunda namoyishchilar politsiya bilan toʻqnashdi. Kuchishlatar tuzilma vakillari olomonga qarshi koʻzdan yosh oqizuvchi gaz va suv purkagichlarni ishlatdi. Soʻngra 66 nafar namoyishchi hibsga olingan edi.
8 mart kuni oʻtkazilgan namoyishda muxolifat vakili Georgiy Vashadze hukumatga ikkita shart qoʻydi.
«Rossiya» qonuni («Xorijiy agentlar» haqidagi qonun nazarda tutilmoqda) zudlik bilan parlamentdan qaytarib olinishi va kecha qoʻlga olinganlar ozod etilishi shart», dedi u. Mamlakat rahbariyatiga 1 soat vaqt beramiz, aks holda «boshqa choralarni koʻramiz», deb qoʻshimcha qildi u.
“Zamin” yangiliklarini “Telegram”da kuzatib boring
