Rossiyalik sobiq vazir armiyaga chaqiruv olganidan keyin AQSHga qochib ketdi

Rossiya tarkibiga kiruvchi Komi respublikasining sobiq qishloq xo‘jaligi va isteʼmol bozori vaziri Denis Sharonov 2022-yil oktabr oyida harbiy xizmatga chaqiruv qog‘ozini olgach, AQSHga jo‘nab ketgan va u yerdan siyosiy boshpana so‘ragan. Bu haqda 15-avgust, seshanba kuni RTVI yangiliklar sayti xabar berdi, jurnalistlar YouTube kanaliga joylangan “Yangi amerikaliklar” videosidan sobiq siyosatchini tanib qolib, u bilan suhbatlashgan.

“Rossiyada vazir bo‘lgan odam AQSHda yuk mashinasi haydovchisiga aylandi” sarlavhali videoda sobiq vazirning ismi aytilmagan, biroq jurnalistlar yuzni tanish servislaridan foydalangan holda videodagi odam Sharonov ekanini aniqlagan. Sobiq amaldor keyinroq RTVI telekanaliga videoda haqiqatan ham o‘zi ekanini tasdiqladi.

Sharonov Rossiyada ikki marta jinoiy javobgarlikka tortilganini, biroq ikki safar ham sud tomonidan oqlanib, reabilitatsiya qilinganini aytdi. Sobiq vazirning so‘zlariga ko‘ra, u 2022-yilning yanvarida Komi rahbari Vladimir Uyba bilan uzoq davom etgan mojaro tufayli respublika qishloq xo‘jaligi vaziri lavozimidan ozod etilgan. Sharonov kuzda armiyaga chaqiruv olganini o‘sha mojaro bilan bog‘ladi.

AQSHga emigratsiya va yuk mashinasini haydash

“Rossiyada qolishim xavfsiz emasligi haqida signallar ola boshladim. 2022-yil oktabr oyida harbiy xizmatga chaqiruv qog‘ozini topshirish uchun kelishganida, u yerda qiladigan ishim qolmadi. Chunki mening yoshim, prinsipial jihatdan, xizmatga unchalik mos emasdi. Bu signal men vazir bo‘lib ishlagan respublikadan ekanini angladim. Bu norozi odamlardan qutulishning bir usuli edi. Dastlab ikkita ta’qibdan qutulib qolgandim, lekin bu safar qarshilik qila olmasligimni bildim. Mamlakatni tark etishdan boshqa choram yo‘q edi”, — dedi Sharonov.

Hozir sobiq vazir AQSHda yuk mashinasi haydovchisi bo‘lib ishlayapti va hukumatdan siyosiy boshpana so‘ramoqda.

“Hozir qilayotgan ishim — yuk mashinasida yuk tashish abadiy ish emasligi aniq, ammo ishni nimadandir boshlash kerak edi, AQSHda yuk tashuvchilik kasbi eng keng tarqalgan”, — deya Sharonov kelajagi uning mamlakatda qolishini qonuniylashtirish jarayoniga bog‘liq ekanini qo‘shimcha qildi.

Yangiliklar