Rossiya Avdiyivkada har 1 kv kmda 1000 dan ortiq harbiysini yo‘qotgan

^{Foto: Aris Messinis/AFP}

Oxirgi ikki oy ichida Ukrainaning Donetsk viloyatidagi Avdiyivkani egallashga uringan Rossiya armiyasida 11,1 kvadrat kilometr hududni egallab olish chog‘ida 13 mingga yaqin askar va zobit halok bo‘ldi hamda yaralandi. Shu tariqa, Rossiyaning yo‘qotishlari 1 kvadrat kilometrga 1000 dan ortiq kishini tashkil etdi. Bu haqda Amerika urushni o‘rganish instituti (ISW) 12 dekabr kuni e’lon qilgan tahliliy sharhda aytiladi, u Oq uy tomonidan shu haftada maxfiylikdan chiqarilgan AQSH razvedkasi ma’lumotlariga taalluqlidir.

Forbes jurnali razvedka ma’lumotlariga tayanib, Rossiyaning Avdiyivkadagi yo‘qotishlari 2022 yilda Ukraina urushi boshlanganining dastlabki ikki oyida Rossiya armiyasi umumiy yo‘qotishlaridan oshib ketganini da’vo qilmoqda. Nashr, shuningdek, AQSH Davlat departamenti ma’lumotlariga asoslanib, urushning dastlabki olti oyida Rossiya armiyasida 20 mingga yaqin kishi halok bo‘lgani va 50-60 ming kishi yaralanganini bildirdi.

Avdiyivka yaqinidagi hujum chog‘ida Rossiya qo‘shinlari shimoliy qanotda 1,5-2 kilometr, janubiy qanotda ham xuddi shunday masofani bosib o‘tishga muvaffaq bo‘ldi, dedi ISW bosh tahlilchisi Jorj Barros. Uning ma’lumotlariga ko‘ra, hujumning birinchi oyida rossiyaliklar 220 ga yaqin harbiy texnikani yo‘qotgan. Halok bo‘lganlarning aksariyati artilleriya o‘qlari qurbonlaridir.

Amerika razvedkasining maxfiy hisobotiga ko‘ra, urush paytida Rossiyaning Ukrainadagi jami yo‘qotishlari halok bo‘lganlar va yaradorlar bo‘yicha 315 ming harbiy xizmatchini tashkil etgan. Ukrainaga qarshi urush boshlanishida Rossiya armiyasida 3500 ta tank bor edi, ulardan 2200 tasi ishdan chiqqan. Bundan tashqari, 13 600 ta piyoda jangovar texnika va bronetransportyoridan 4400 tasi yo‘q qilindi, bu umumiy ko‘rsatkichning 32 foizini tashkil qiladi.