Foto: Yonhap
Janubiy Koreyaning asosiy muxolifatdagi “Toburo” demokratik partiyasi raisi Li Chje Myon 2 yanvar, seshanba kuni ommaviy tadbir vaqtida pichoqlandi.
Pusandagi yangi aeroport qurilishida jurnalistlar bilan suhbatlashayotgan siyosatchining yoniga dastxat olish uchun kelgan taxminan 50-60 yoshlardagi noma’lum erkak to‘satdan uning bo‘yniga pichoq urgan.
Yonhap agentligi xabariga ko‘ra, hujumchi voqea joyida qo‘lga olindi.
Hodisa vaqtida olingan suratlarda Janubiy Koreya muxolifati yetakchisi atrofida olomon to‘planib, ko‘zlari yumilgan holda yerda yotgani, uning bo‘yniga ro‘molcha bosishayotgan aks etgan. Mahalliy OAV xabar berishicha, Li qon ketayotgan bo‘lsa-da, hushini yo‘qotmagan. Birinchi tibbiy yordam ko‘rsatilgandan so‘ng, u kasalxonaga yetkazilgan.
Foto: Yonhap
Janubiy Koreya prezidenti Yun Sok Yol tezkor tergov o‘tkazishni buyurdi va Lini qo‘llab-quvvatlashini bildirdi, deyiladi prezident idorasi bayonotida.
Sonnam shahrining sobiq meri Li Chje Myon “Toburo” demokratik partiyasini 2022 yilning o‘rtalaridan beri boshqarib keladi. U 2022 yil mart oyida bo‘lib o‘tgan prezidentlik saylovida Yun Sok Yolga yutqazgan.
“Zamin” yangiliklarini “Telegram”da kuzatib boring
