Foto: Vladimir Gerdo/TASS/dpa/picture alliance
Ukraina ommaviy axborot vositalari ma’lumotiga ko‘ra, Azov dengiz uzra Rossiyaning A-50 josus samolyoti urib tushirilgan va Il-22M bombardimonchi samolyotiga jiddiy zarar yetkazilgan. Dastlab, bu haqda ma’lumot 15 yanvar, dushanbaga o‘tar kechasi Ukraina Oliy radasi deputatlari Yuriy Misyagin va Aleksandr Fediyenkovning Telegram-kanallarida paydo bo‘ldi.
«A-50 urib tushirildi, Il-22 ga zarar yetkazildi, ikkinchisi havoda edi va eng yaqin aerodromga borishga harakat qildi, lekin u Kerch hududida pasayishni boshlaganidan keyin radarlardan g‘oyib bo‘ldi», dedi Oliy radaning mudofaa masalalari qo‘mitasi rahbari o‘rinbosari Yuriy Misyagin.
Keyinchalik bu ma’lumotni «RBK-Ukraina» ukrainalik harbiylarga tayanib, «Gromadske» esa Ukraina Bosh razvedka boshqarmasiga tayanib tasdiqladi. OAV ma’lumotlariga ko‘ra, A-50 urib tushirilgan, Il-22M esa shikastlangan. A-50 radarlardan g‘oyib bo‘ldi va Rossiya taktik aviatsiyasining so‘rovlariga javob berishni to‘xtatdi, keyinroq Rossiyaning Su-30 uchuvchisi «noma’lum samolyot alangalangani va halokatga uchraganini» aniqladi, deb yozadi «RBK-Ukraina».
Nashr manbasi, shuningdek, dispetcherdan Anapa aeroportiga favqulodda qo‘nishni so‘ragan Il-22M bombardimonchi samolyoti uchuvchisi o‘rtasidagi suhbatni tutib olgani haqidagi taxminni taqdim etdi.
Rossiya mudofaa vazirligi samolyotga berilgan zarbalar haqidagi ma’lumotga rasman izoh taqdim etmadi. Rossiya mudofaa vazirligiga yaqin bo‘lgan «Ribar» Telegram-kanali voqeaning versiyalaridan biri sifatida Rossiya havo mudofaa tizimidan «do‘stona nishonga olish»ni keltirdi.
A-50 - uzoq masofali radiolokatsion aniqlash va boshqarish sovet samolyoti. U radarni olib yuradi hamda zarbalarni tayyorlash va dushman hujumlarining oldini olish uchun oldingi razvedkada ishlatiladi. Rasmiy ma’lumotlarga ko‘ra, Rossiyada bunday samolyotlar soni 10 dan kam. Bitta A-50 ning narxi 330 million dollarga baholanadi.
“Zamin” yangiliklarini “Telegram”da kuzatib boring
