Ukraina Xerson oblastidagi amaliyotda elita jangchilari halok bo‘lganini ma’lum qildi

^{Foto: Videodan kadr}
Ukraina maxsus operatsiyalar kuchlarining 73-dengiz guruhi harbiy xizmatchilari jangovar topshiriqni bajarish vaqtida rossiyalik harbiylar bilan to‘qnashuv oqibatida halok bo‘lgan, deb xabar bergan Ukraina QK Maxsus operatsiyalar kuchlari (SSO).

«Maxsus topshiriq bajarilganidan keyin jangchilar guruhning asosiy kuchlari olib ketilishini ta’minlash uchun so‘nggi jangini o‘tkazishdi va abadiyga xizmatda qolishdi», — deyiladi xabarda. Jangovar topshiriq tafsilotlari va Ukraina qurolli kuchlari harbiylari uni qayerda amalga oshirgani borasida aniqlik kiritmagan. Qancha jangchi halok bo‘lgani ham aniq emas.

Xerson oblastining RF tomonidan anneksiya qilingan qismi ma’muriyati rasmiylari va Rossiyadagi propaganda nashrlar xabar qilishicha, ukrain diversantlari guruhi Xerson oblasti janubidagi Tendrovskaya qumlog‘iga tushishga harakat qilgan.

Mahalliy «Biz Rossiya bilan birgamiz» («Mi vmeste s Rossiyey») harakati raisi Vladimir Rogov gap Ukraina harbiy-dengiz kuchlarining 73-dengiz guruhi haqida bormoqda va uning a’zolari amalda to‘lig‘icha rossiyalik harbiylar tomonidan «yo‘q qilingan».

Kreml ta’siridagi Mash telegram-kanali xabar qilishicha, ukrain harbiylari beshta qayiqda Tendrovskaya qumlog‘iga tushishga harakat qilgan. Jang natijasida RF harbiylari to‘rtta qayiqni ishdan chiqargan, beshinchisi suzib ketishga muvaffaq bo‘lgan. Xabarda aytilishicha, kamida 20 nafar ukrain harbiysi halok bo‘lgan, yana biri yaralanib, asir tushgan. Rossiyalik harbiylar bir qancha miltiq, pulemyot va granatomyotlarni qo‘lga kiritgan, ular orasida AQSH va Germaniyada ishlab chiqarilganlari ham bor.

Ukrainaning «Strana» nashri qayd etishicha, 28 fevral kuni ukrain harbiylarining ijtimoiy tarmoqlarida «SSO uchun qora kun» haqidagi xabarlar paydo bo‘lgan. Izohlarda harbiylar Rossiya qo‘shinlari nazoratidagi hududlar ichkarisidagi Tendrovskaya qumlog‘ida amaliyot o‘tkazish naqadar to‘g‘riligi borasida savollar berishgan. “Zamin” yangiliklarini “Telegram”da kuzatib boring