Bayden G‘azoda darhol o‘t ochishni to‘xtatishga chaqirdi

^{Foto: Endryu Harnik / Getty Images}
AQSH prezidenti Jo Bayden Isroil bosh vaziri Binyamin Netanyaxuni imkon qadar tezroq o‘t ochishni to‘xtatish va G‘azoda garovga olinganlarni ozod qilish bo‘yicha kelishuvga erishishga chaqirdi.

"Oq uydagi yig‘ilishda Bayden “qolgan bo‘shliqlarni bartaraf etish, imkon qadar tezroq kelishuvga erishish, garovga olinganlarni uylariga qaytarish va G‘azodagi urushni abadiy tugatishga erishish” zarurligini ta’kidlagan", deyiladi Oq uy bayonotida.

Netanyaxu bilan uchrashuvda Bayden, shuningdek, yana bir bor G‘azoda gumanitar yordamni ko‘paytirish va tinch aholi himoyasini yaxshilashga chaqirgan.

"Yordam yetkazib berish yo‘lidagi barcha to‘siqlarni olib tashlash va ularga muhtoj bo‘lganlarga asosiy xizmatlarni tiklash zarur", deyiladi xabarda.

Shu bilan birga, AQSH yetakchisi yana bir bor harbiy amaliyotlar paytida tinch aholi hayotini himoya qilish zarurligini qayd etgan.

Bayden Qo‘shma Shtatlarning “Eron va uning ishonchli vakillari, jumladan, G‘azodagi HAMAS, Livandagi “Hizbulloh” jangarilari va Yamandagi husiylar tomonidan kelayotgan barcha tahdidlarga qarshi Isroil xavfsizligini ta’minlashga sodiqligini” yana bir bor tasdiqlagan.

Demokratik partiyadan prezidentlikka potensial nomzod va AQSH vitse-prezidenti Kamala Harris ham HAMASni shafqatsiz terrorchi tashkilot sifatida qoralab, jangarilarni qo‘llab-quvvatlovchi har qanday ritorika jirkanch va qabul qilib bo‘lmas ekanligini ta’kidlagan. Siyosatchi butun dunyoda antisemitizm kuchayishiga qarshi kurashish muhimligini aytgan.

"Urushni Isroil xavfsiz bo‘lgan, barcha garovga olinganlar ozod etilgan, G‘azodagi falastinliklarning azob-uqubatlari tugagan, falastinliklar o‘z erkinligi, qadr-qimmati va o‘z taqdirini o‘zi belgilash huquqidan foydalanishi mumkin bo‘lgan tarzda tugatish vaqti keldi", deya xulosa qilgan u. “Zamin” yangiliklarini “Facebook”da kuzatib boring