Eron prezidenti Isroilga qilingan hujumga izoh berdi

^{Foto: Reuters}
Eron prezidenti Mas’ud Pezeshkiyon Tehron urush qidirmayotganini, balki har qanday tahdidga qat’iy qarshilik ko‘rsatayotganini ma’lum qildi.

Bundan tashqari, Pezeshkiyon Eron Isroilning harakatlariga qonuniy huquqlar asosida javob berganini ta’kidlagan.

“Isroilning qonunbuzarliklariga qonunga muvofiq va Eron hamda mintaqa tinchligi va xavfsizligi uchun qat’iy javob berildi. Bu qadamlar Eron manfaatlari va fuqarolarini himoya qilish uchun qilingan. Netanyaxu bilishi kerak-ki, Eron urush qidirmayapti, balki har qanday tahdidga qat’iy qarshilik ko‘rsatmoqda, bu bizning kuchimizning bir qismidir”, deb yozdi Eron yetakchisi X sahifasida.
Pezeshkiyon, shuningdek, Isroilni Eron bilan ziddiyatga bormaslikka chaqirgan.

1 oktyabr kuni Isroil armiyasi Eron mamlakat tomon raketa uchirgani haqida xabar bergan edi. OAV xabarlariga ko‘ra, Eron tomonidan jami 500 ga yaqin raketalar uchirilgan.

Raketalarning bir qismi “Temir gumbaz” havo mudofaa tizimidan o‘tib yerga tushgan. Vayronagarchiliklar ko‘lami haqida hozircha aniq ma’lumot yo‘q.

Butun mamlakat bo‘ylab havo hujumi haqida ogohlantirish e’lon qilindi. Isroil aholisiga zudlik bilan boshpanalarga joylashish buyurilgan. “Zamin” yangiliklarini “Instagram”da kuzatib boring