Rossiya armiyasi Kursk oblastida qoʻldan chiqargan hududlarining chorak qismini qaytarib oldi

^{Foto: vk.com/sudgaonline}
Ukraina Qurolli kuchlari (UQK) Rossiya armiyasining qarshi hujumi faollashgani fonida Kursk oblastidagi pozitsiyalarini qoʻldan boy berishni boshladi, deb yozadi Newsweek. Nashr frontdagi vaziyatni kuzatib boradigan ochiq manbalardagi ma'lumotlarni tahlil qilib, shunday xulosaga kelgan.

Ukrainaning OSINT loyihasi jangovar harakatlar xaritasini e'lon qilgan, undan ma'lum boʻladiki, oktyabr boshidan beri Rossiya qoʻshinlari Kursk oblastida 120 kvadrat kilometr maydonni egallashga muvaffaq boʻlgan. Jumladan, ularning 65 kvadrat kilometri oxirgi dam olish kunlari qoʻlga kiritilgan. Ayni vaqtda UQK 660 kvadrat kilometrga yaqin maydonni nazorat qilmoqda, yana 360 kvadrat kilometr kulrang zonaga kiradi. Tahlilchilarning ma'lumotlariga koʻra, Kursk oblastiga amalga oshirilgan hujumning eng yuqori nuqtasi vaqtida ukrain kuchlari 900 kvadrat kilometr maydonni egallagan.

Rossiyalik harbiylar asosan Korenevskiy rayonida muvaffaqiyatga erishgan. «Ikki mayor» Z-kanalining yozishicha, ular Tolstoy Lug va Novoivanovkani ham egallagan. RF Mudofaa vazirligiga yaqin manbaga koʻra, armiya Olgovka, Lyubimovka, Zeleniy Shlyax, Nijniy Klin posyolkalari ustidan nazoratni qaytarib olgan. Bundan tashqari, rus harbiylari Lyubimovka rayonida UQKni qurshab olgan.

DeepState ushbu aholi punktlari, shuningek, Zelyoniy Shlyax va Novoivanovka qoʻldan chiqqanini tan oldi. Shu bilan birga, yuqorida qayd etilgan qolgan posyolkalar hamon Ukraina nazorati ostida ekani ta'kidlandi. «Hromadske radio» efirida tahlilchi va loyiha asoschilaridan biri Roman Pogoreliy Kursk oblastidagi vaziyatni murakkab deb atadi. Uning soʻzlariga koʻra, Rossiya u erga koʻplab texnikalarga ega 50 mingga yaqin harbiysini yuborgan va hozirda zaxiralarini jangga kiritgan.

Pogoreliyning qoʻshimcha qilishicha, ukrian harbiylariga radioelektron kurash vositalari etishmayapti. Hozirda eng qaqshatkich janglar egallab olingan hududning gʻarbiy qanotida ketmoqda, ammo sharqiy qismda sezilarli oʻzgarishlar bor. Rossiya armiyasi u erda Spalnoe va Borki qishloqlarini tortib olgan va UQKni Plexovodan quvib chiqarishni boshlagan.

Bild eksperti Yulian Repkening prognozlariga koʻra, yaqin vaqt ichida Sudja uchun janglar boshlanadi. Uning aytishicha, hozircha «ukrainlar u erda qancha turib bera olishi, mudofaani qanchalik yaxshi tiklaganini» aytish qiyin, ammo vaziyat shundayki, rossiyaliklar «sekin-asta oʻz chegaralari tomon qayta harakatlanib, UQKni siqib chiqarmoqda».

11 oktyabr kuni Chechenistonning «Axmat» maxsus kuchlari qoʻmondoni Apti Alaudinov «Komsomolskaya pravda» gazetasiga bergan intervyusida Rossiya Federatsiyasi allaqachon Kursk oblastida 15 aholi punktidan ukrainalik harbiylarni siqib chiqarganini aytgandi.

Z-bloger Boris Rojinning yozishicha, Rossiya qoʻshinlari UQK kabi gʻildirakli emas, balki gusenitsali texnikalardan foydalangani bois ustunlikka ega boʻlmoqda. ISW tahlilchilarining ta'kidlashicha, yoʻllarning yoʻq qilinishi Kursk oblastida qarshi hujumni faollashtirish borasidagi Moskva qaroriga ta'sir koʻrsatgan. Ukrainaning «Aydar» bataloni askari Stanislav Bunyatovning qayd etishicha, noqulay ob-havo uchuvchisiz uchish apparatlari va harbiy texnikalar ishiga xalqit bermoqda. “Zamin” yangiliklarini “Telegram”da kuzatib boring