Zelenskiy: “Yo Ukraina yadroviy qurolga ega boʻladi, yo biz NATOga qoʻshilamiz”

^{Foto: AP Photo}
Vladimir Zelenskiy AQSh prezidentligiga nomzod Donald Tramp bilan muloqotda Ukrainaning NATOga a'zo boʻlish zaruratini muhokama qilganini aytdi.

Uning qoʻshimcha qilishicha, Kievning yadroviy quroldan voz kechishi ham suhbat mavzularidan biri boʻlgan. Zelenskiy bu haqda Evropa kengashi yigʻilishida ishtirok etib, gʻalaba rejasini taqdim etganidan soʻng oʻtkazilgan matbuot anjumanida ma'lum qilgan.

Ukraina etakchisi Budapesht memorandumini yadro qurolidan voz kechgan Ukrainani himoya qila olmaydigan samarasiz kelishuv sifatida eslagan:

“Bu yirik yadroviy davlatlarning qaysi biri jabr koʻrdi? Hammasimi? Yoʻq, faqat Ukraina. Kim yadroviy quroldan voz kechdi? Ukraina. Bugun kim jang qilmoqda? Ukraina”.

U Tramp bilan suhbatda “yo Ukrainada yadroviy qurol boʻlishi yoki mamlakat qandaydir ittifoqqa a'zo boʻlishi kerak”ligini aytgan. Shuningdek, Zelenskiy hozirda NATOdan boshqa samarali ittifoqni bilmasligini ta'kidlagan.

Uning qoʻshimcha qilishicha, NATO davlatlari bugun urush holatida emas, shu sababli Ukraina yadro qurolini emas, alyansni tanlaydi.

Ukraina etakchisi, shuningdek, agar sheriklari uning gʻalaba rejasini qoʻllab-quvvatlamasa, bu katta xato hamda Rossiya uchun imtiyoz boʻlishini aytgan.

Zelenskiyning soʻzlariga koʻra, Evropa ittifoqi sammitida 18 ta etakchi uning rejasi haqida fikr bildirgan va koʻpchilik buni qoʻllab-quvvatlagan. “Zamin” yangiliklarini “Telegram”da kuzatib boring