Rossiya armiyasining Kupyanskka yurishi haqida nimalar ma'lum?

^{Foto: Getty Images}
Rossiya qoʻshini Xarkiv oblasti sharqida, Kupyansk shahridan janubi-sharqda ilgarilamoqda. Geolokatsiya kadrlari ular Kolesnikovo qishlogʻining bir qismini egallaganini tasdiqlaydi, Rossiyadagi harbiylashgan blogerlar esa rossiyaliklar Kruglyakovka hududida Kupyansk — Borovaya shossesini toʻsib qoʻyganini aytishmoqda.

Rossiya qismlari Borovaya trassasiga chiqqanining rasmiy tasdigʻi yoʻq, ammo shunisi ayonki, u toʻligʻicha zarba berish masofasida turibdi va Ukraina qurolli kuchlari undan toʻlaqonli foydalana olmaydi.

Bu shuni anglatadiki, Rossiya armiyasi amalda Oskol daryosi sharqiy sohilidagi ukrain platsdarmini asosiy kuchlardan uzib qoʻyishga muvaffaq boʻlgan. Endi Kupyanskning sharqiy chekkalarini mudofaa qilayotgan ukrain boʻlinmalari ta'minoti Chuhiyev — Svatove trassasidagi yarim vayrona holatga kelgan koʻprik orqaligina amalga oshirilishi mumkin. Bunday logistika juda ishonchsiz va ilk aviabomba yoki raketa koʻprik tayanchiga aniq kelib tushishi bilan u orqali harakatlanish butkul imkonsiz boʻlib qoladi.


Shuningdek, Rossiya boshqa koʻplab yoʻnalishlarda — Kupyanskdan sharqda, janubi-sharqda va shimoli-sharqda ham hujum qilayotgani xabar qilingan.

Xarkiv oblasti harbiy ma'muriyati rahbari Oleg Sinegubov 15 oktyabr kuni «harbiy vaziyat yomonlashgani tufayli» Kupyansk shahrida, shuningdek Kondrashovka, Kurilovka va Borovaya obshchinalarida yashovchi aholi majburiy evakuatsiya qilinishini e'lon qildi.

^{Kupyansk hududidan ommaviy evakuatsiya 2023 yil yoz-kuzida, Rossiya armiyasining yangi qarshi hujumidan keyin boshlangandi}
Urushga qadar 55 mingdan ortiq kishi yashagan Kupyansk aglomeratsiyasi Xarkiv oblastining yirik shaharlaridan biri hisoblangan. Qolaversa, Kupyansk — yirik transport tuguni boʻlib, bir necha avtotrassa hamda beshta temiryoʻl liniyasi u orqali oʻtgan.

Shahar 2022 yil fevralida, bosqinning ilk kunlaridayoq Rossiya qoʻshini tomonidan bosib olingandi. U harbiy ta'minotda muhim rol oʻynagan, xususan, Rossiyaning Izyum atrofida jang qilgan guruhi uchun harbiy yuk va qoʻshimcha kuchlar Belgorod oblastidan aynan Kupyansk orqali etkazilgan.

Ammo 2022 yil sentyabrida Ukraina qurolli kuchlari qarshi hujumga oʻtib, Kupyanskni ozod qiladi, natijada Izyum guruhi zudlik bilan chekinishga majbur boʻladi, Kupyanskdagi Rossiya qismlari esa Oskol daryosi ortidagi hudud ichkarisiga uloqtirib tashlanadi. 2023 yil yozida Rossiya qoʻshini yana Kupyansk yoʻnalishida hujumga oʻtgandi, ammo, son jihatdan ustunligi va yaxshi qurollanganiga qaramay, «Zapad» guruhi boʻlinmalarining ilgarilashi juda sekin kechdi.

Shunga qaramay, 2024 yil kuziga kelib Rossiya armiyasi Kupyansk shahriga tahdidli darajada yaqinlashdi. Shahar muntazam ravishda oʻqqa tutilmoqda va vayron qilinmoqda, aholining aksari evakuatsiya toʻgʻrisidagi buyruqdan ancha oldinroq ketishga ulgurgan.

^{Foto: Getty Images}
Hozirgi bosqichda Rossiya qoʻmondonligi Xarkivga Kupyansk tomondan hujum qilish rejasini koʻrib chiqayotgani ehtimoli juda kam. Birinchidan, oblast markaziga qadar masofa 90 kilometr chiqadi va bu masofa yoʻlsiz va koʻplab tabiiy toʻsiqlardan iborat. Ikkinchidan, Kupyanskni toʻliq egallashning oʻzi ham muammoli ish — shaharning katta qismi daryoning qarama-qarshi sohilida boʻlib, bu sohil sharqiy sohilga qaraganda balandroqda joylashgan, daryo ustidan oʻtgan koʻpriklar esa Rossiya qoʻshini yaqinlashishi bilan portlatilishi aniq.

Kupyansk-Uzlovoy temiryoʻl stantsiyasi egallanishi ham Rossiya harbiy logistikasini osonlashtirishi dargumon. U shaharning sharqiy qismida joylashgan boʻlsa-da, daryoga shunchalik yaqin qurilganki, gʻarbiy sohildan turib uni toʻgʻridan toʻgʻri oʻqqa tutish mumkin.

Ammo Oskol daryosi sharqidagi ukrain platsdarmi tugatilishi hamda Ukraina qurolli kuchlari suvombori ortiga surib tashlanishi Rossiya armiyasiga barqaror mudofaa barpo etish va oʻz guruhining oʻng qanoti xavfsizligini ta'minlashga imkon beradi. Bu esa, oʻz navbatida, hujumlar yoʻnalishini oʻzgartirishga — daryo va temiryoʻl yoqalab janubga, Slovyansk-Kramatorsk aglomeratsiyasi tomonga yurish boshlash uchun sharoit yaratadi.

Manba: Kun.uz “Zamin” yangiliklarini “Telegram”da kuzatib boring