Putin «Oreshnik» raketalari qurollanishga qabul qilinishi va seriyali ishlab chiqarilishini e'lon qildi

^{Foto: kremlin.ru}
Rossiya 21 noyabr kuni Ukrainaga uchirgan oʻrta masofaga moʻljallangan «Oreshnik» eksperimental ballistik raketasini seriyali ishlab chiqarish boʻyicha allaqachon qaror qabul qilingan. Bu haqda Vladimir Putin Kremlda Mudofaa vazirligi rahbariyati va harbiy sanoat kompleksi vakillari bilan boʻlib oʻtgan uchrashuvda ma'lum qildi.

Strategik raketa kuchlari qoʻmondoni Sergey Karakaev «Oreshnik» raketasini qurollanishga olish taklifini bergan. «Shunday qilamiz», — deya javob qaytargan RF prezidenti. Karakaevning soʻzlariga koʻra, yangi raketa butun Evropa hududidagi nishonlarni ishgʻol etishi mumkin, uni ommaviy qoʻllashni esa yadroviy quroldan foydalanishga taqqoslasa boʻladi.

«Yangi tizim sinovini davom ettiramiz. Seriyali ishlab chiqarishni yoʻlga qoʻyishimiz kerak. Ushbu tizimni seriyali ishlab chiqarish boʻyicha qaror qabul qilingan deb hisoblaymiz. Umuman olganda, u deyarli tashkillashtirib boʻlingan. Mazkur qurolning oʻziga xos kuchini inobatga olgan holda u aynan Strategik maqsadli raketa qoʻshinlari qurollanishiga etkazib beriladi», — deydi Putin.

Prezident yangi «Oreshnik» raketa tizimini Rossiya «hududiy yaxlitligi va suverenitetining ishonchli kafolati» deb atadi. «Yaxshi bilamizki, bunday qurol hozircha dunyoda hech kimda yoʻq. Qoʻshimcha qilaman, bu kabi raketaga qarshi va uni tutib qoluvchi vositalar bugungi kunda dunyoda yoʻq, mavjud emas», — deya ta'kidladi Putin. U «Oreshnik» raketalar tizimini yaratganlar davlat mukofotlariga taqdim etilishini va'da qildi.

Putinning soʻzlariga koʻra, Rossiyada «Oreshnik» tizimidan tashqari yana bir nechta shu kabi tizimlarni yaratish ustida ish olib borilmoqda. «Sinovlar natijasi boʻyicha, ushbu qurollar ham seriyali ishlab chiqarishga yuboriladi», — deydi Putin.

Rossiya prezidenti Vladimir Putin 21 noyabr kuni Ukrainaning Gʻarbda ishlab chiqarilgan uzoq masofaga moʻljallangan raketalar bilan Rossiya hududiga berilgan zarbalariga javoban Rossiya nima qilgani haqida kutilmaganda batafsil ma'lumot berdi. Xususan, u Dniprodagi «Yujmash» korxonasiga «Oreshnik» eksperimental ballistik tizimi orqali uyushtirilgan hujum haqida gapirdi. RF prezidentining ma'lum qilishicha, Rossiya ushbu sinovni Ukraina Qurolli kuchlari (UQK) 19 va 21 noyabr kunlari Bryansk hamda Kursk oblastlaridagi nishonlarga ATACMS hamda Storm Shadow raketalari yordamida uyushtirilgan hujumga javob tariqasida amalga oshirgan. “Zamin” yangiliklarini “Telegram”da kuzatib boring