Ukraina elchisi: “Rossiya armiyasi Odessa va Nikolayevni bosib olishiga Turkiya to‘sqinlik qilgan”

^{Foto: Hurriyet}
Rossiyaning Ukrainaga keng ko‘lamli bosqini boshlanganidan keyin Bosfor va Dardanell bo‘g‘ozlarining Turkiya tomonidan yopilishi Odessa, Nikolayev va boshqa hududlarning bosib olinishiga to‘sqinlik qildi. Bu haqda Ukrainaning Turkiyadagi elchisi Vasiliy Bodnar xabar berdi.

"Bosfor va Dardanell bo‘g‘ozlarining Turkiya tomonidan yopilishi Ukraina mudofaasining asosiy bosqichlaridan biri bo‘ldi. Biz bitta “Moskva”ni cho‘ktirib yubordik, yana ikkita rus kreyseri esa O‘rta Yer dengizida kutib turardi. Turkiya bo‘g‘ozlarni yopgani, menimcha, Rossiyaga Odessa, Nikolayev va boshqa hududlarni bosib olish uchun dengizdagi ustunligidan foydalanishga imkon bermadi", dedi Bodnar.
Bundan tashqari, diplomat Turkiya Ukraina uchun jiddiy transport xabiga aylanganini qo‘shimcha qildi.

Ilgari Ukraina uchun yuklar ortilgan kemalar Turkiya portlarida to‘xtaganida, normativ baza ukrainalik tashuvchilarning bu yuklarni olib ketish uchun kirishiga yo‘l qo‘ymasdi. Hozir esa transport sohasida vizasiz tizim joriy etilgan. Kompaniyalarimiz litsenziya va ruxsatnomalarsiz Turkiya va boshqa davlatlar portlaridan Turkiya hududi orqali Ukrainaga juda zarur yuklar tashimoqda, dedi diplomat.
Eslatib o‘tamiz, yaqin orada Vasiliy Bodnar Ukrainaning Polshadagi elchisi lavozimini egallaydi. Tegishli farmonni Ukraina prezidenti Vladimir Zelenskiy allaqachon imzolagan.

Ukrainadagi urush: Turkiya pozitsiyasi

Kuni kecha Turkiya prezidenti Rajab Toyyib Erdo‘g‘on AQSH Ukraina armiyasiga ATACMS raketalari yordamida Rossiya hududiga zarba berishga ruxsat berganini tanqid qildi.

Shuningdek, Erdo‘g‘on AQSHning yangi saylangan prezidenti Donald Tramp “muammoni hal qilishga asoslangan yondashuvni qo‘llasa”, Ukrainadagi urush tezda tugashi mumkinligiga ishonch bildirdi:

"Agar Tramp ma’muriyati muammoga yechim topish nuqtayi nazari bilan yondashganini ko‘rsak, bu urushni osonlikcha tugatishimiz mumkin... Ko‘proq muloqot, diplomatiya va kelishuv qurol-yarog‘, bomba va mojarolarga emas, balki tinchlikka yo‘l ochadi", degan Turkiya rahbari. “Zamin” yangiliklarini “Vkontakti”da kuzatib boring