AZAL samolyoti qoʻnayotgan vaqtda Grozniyga Ukraina uchuvchisiz uchoqlari hujum qilgani tasdiqlandi

^{Foto: Meiramgul Kussainova/Anadolu/picture alliance}
Rosaviatsiya Azerbaijan Airlines (AZAL) samolyoti Grozniyga qoʻnayotgan vaqtda shaharga Ukraina uchuvchisiz uchoqlari hujum qilganini tasdiqladi.

«Oʻsha kuni va oʻsha soatlarda Grozniy aeroporti hududidagi vaziyat juda ogʻir edi, oʻsha paytda Ukrainaning jangovar uchoqlari Grozniy va Vladikavkaz shaharlaridagi fuqarolik infratuzilmasiga terroristik hujumlar uyushtirdi. Grozniy aeroporti hududida maxsus rejim joriy qilindi, u barcha samolyotlarning belgilangan hududdan zudlik bilan chiqib ketishini nazarda tutadi», dedi 27 dekabr, juma kuni idora boshligʻi Dmitriy Yadrov.

Bundan tashqari, uning soʻzlariga koʻra, aeroport hududida 500 metr balandlikda zich tuman boʻlgan. Uchuvchilar samolyotni ikki marta qoʻndirmoqchi boʻlgan, biroq muvaffaqiyatsizlikka uchragan. Yadrovning aytishicha, samolyot komandiriga qoʻnish uchun Rossiya Federatsiyasining boshqa aeroportlari taklif qilingan, biroq u goʻyoki Qozogʻistonning Oqtov shahriga uchishga qaror qilgan. «Birgalikda oʻrganilishi kerak boʻlgan juda koʻp turli xil holatlar mavjud, biz hamkasblarimiz bilan hamkorlikda bu ishga toʻliq tayyormiz», dedi Rosaviatsiya rahbari.

Boku: AZAL samolyoti qurol ta'siridan soʻng qulagan

Ozarboyjon hukumati Bokudan Grozniyga yoʻl olgan Azerbaijan Airlines (AZAL) samolyoti qurol ta'siridan soʻng Qozogʻistonda halokatga uchraganini ilk bor ommaviy ravishda ma'lum qildi. Buni 27 dekabr kuni Ozarboyjon raqamli rivojlanish va transport vaziri Rashad Nabiev amalga oshirdi.

Jurnalistlar bilan suhbatda u dastlab samolyot qushlar galasi bilan toʻqnashgani haqidagi versiya boʻlganini, biroq Nabievning soʻzlariga koʻra, samolyotning erdagi qoldiqlari va guvohlarning koʻrsatmalari tashqi ta'sir haqida gapirishga imkon berganini aytdi. «Tergov bu aralashuv qanday qurol bilan amalga oshirilganini aniqlaydi», dedi vazir.

«Jarohatlangan yoʻlovchilar va tirik qolgan bort kuzatuvchilar Grozniy uzra oʻtayotganlarida portlash ovozini eshitganliklarini aytishdi. Hatto bort kuzatuvchilardan biri qoʻlidan yaralangan. Shuningdek, ijtimoiy tarmoqlar va OAV tomonidan tarqatilgan videolavhalardan ham ma'lum boʻlishicha, ayol kishi qoʻli va oyogʻidan jarohatlangan. Bundan tashqari, samolyotning ichida va fyuzelyajida koʻzga koʻrinadigan teshiklar bor. Rossiya fuqarolari boʻlgan jabrlanuvchilar ham Grozniy uzra parvoz vaqtida uchta portlashni eshitganliklarini aytishdi. Ularning soʻzlariga koʻra, portlashlar tashqarida sodir boʻlgan, keyin esa samolyotga nimadir tegib ketgan», — dedi Nabiev. “Zamin”ni Telegramʻda oʻqing!