Hind kinosi yulduzi Saif Ali Xon oʻz uyida pichoqlab ketildi

^{Foto: Hindustan Times}
Bollivud yulduzi Saif Ali Xon uyiga oʻgʻri kirib, unga pichoq bilan hujum qildi. Aktyor ogʻir tan jarohatlar bilan Hindistonning Mumbay shahrida kasalxonaga yotqizildi.

Voqea 16 yanvarga oʻtar kechasi, aktyor va uning rafiqasi — aktrisa Karina Kapur Xon hamda ularning 7 va 3 yoshli oʻgʻillari uxlab yotgan vaqtda sodir boʻlgan. Bolalar va Karina Kapurga zarar etmagan.

“Kecha kechqurun noma'lum shaxs aktyor Saif Ali Xonning uyiga kirib, uning xizmatkori bilan urishgan, buni eshitgan aktyor aralashib, erkakni ajratmoqchi boʻlganda u pichoq bilan hujum qilib, unga tan jarohatlari etkazgan. Tergov ishi qoʻzgʻatilib, politsiya jinoyatchini qidiruvga bergan”, deyiladi Mumbay politsiyasi bayonotida.

^{Foto: Hindustan Times}
Aktyorning yaqinlari uning uyida oʻgʻrilik qilishga urinish sodir boʻlganini aytishgan. Mumbay kasalxonasi ma'lumot berishicha, Ali Xonga olti marta umurtqa pogʻonasi va boʻyniga pichoq sanchilgan. Hozirda uning uyida ishlagan uch nafar xodim soʻroq qilinmoqda, ulardan biri ham voqea joyida jarohat olgan.

1993 yildan beri Saif Ali Xon 60 dan ortiq filmlarda, jumladan, Uilyam Shekspirning “Otello” asariga moslashtirilgan “Omkara” filmi, “Muqaddas oʻyinlar” serialida suratga tushgan. U “Muhabbat kecha va bugun” melodramasi, “Agent Vinod” trilleri va “Goaga borib kelamiz” komediyasiga prodyuserlik qilgan.

^{Foto: Times of India}
Uning birinchi nikohi havas qilarli boʻlmadi. Ikkinchi turmushi — Raj Kapurning nevarasi Karina Kapur bilan oila qurganiga 10 yildan oshdi. Birinchi turmushidan aktyorning ikki farzandi bor — qizi Sara Ali Xon, u ham aktrisa va oʻgʻli Ibrohim Ali Xon — Bollivudda debyut qilish arafasida. Ikkinchi nikohidan esa ikki oʻgʻli — Taymur va Jeh ismli bolalar voyaga etmoqda. “Zamin” yangiliklarini “Telegram”da kuzatib boring