Prezident Malayziya Islom san'ati muzeyiga tashrif buyurdi (foto)

^{Foto: Prezident matbuot xizmati}
Oʻzbekiston Respublikasi Prezidenti Shavkat Mirziyoyev rasmiy tashrif doirasida Malayziya Islom san'ati muzeyiga tashrif buyurdi.

Ta'kidlash joizki, ushbu majmua mamlakatning eng yirik muzeylaridan biri hisoblanadi. U 1998 yilda tashkil etilgan.

Muzey an'anaviy islom me'morchiligi uslubida barpo etilgan boʻlib, uning umumiy maydoni 30 ming kvadrat metrdan ziyodni tashkil etadi.

Bino gumbazining ichki qismini bezash va restavratsiya ishlarida oʻzbekistonlik ustalar ishtirok etgan.

Bu erda 10 mingdan ortiq islom san'ati namunalari saqlanmoqda. Doimiy ekspozitsiyada Qur'on qoʻlyozmalarining noyob toʻplami, sopol va qimmatbaho buyumlar, qurol-yarogʻ namunalari va inshootlar maketlari, taqinchoqlar, tangalar va boshqa ashyolar namoyish etilmoqda.

Muzey fondida zamonaviy Oʻzbekiston hududida turli tarixiy davrlarda yaratilgan 200 ga yaqin noyob eksponatlar alohida oʻrin egallaydi. Ular orasida oʻrta asrlarga oid qoʻlyozmalar, zargarlik buyumlari, mashhur abr matolari va kiyim namunalari, Sharq Renessansiga oid kulolchilik buyumlari mavjud.

Davlatimiz rahbari eksponatlarni koʻzdan kechirish chogʻida birgalikda tadqiqotlar oʻtkazish va koʻrgazmalar tashkil etish, ilmiy va madaniy almashinuvni kengaytirish muhimligini ta'kidladi.
“Zamin” yangiliklarini “Telegram”da kuzatib boring