Polsha Evropada yagona armiya tuzilishiga qarshi chiqdi

^{Foto: REUTERS}
Evropa davlatlari Rossiya tomonidan boʻlayotgan tahdidlarga qarshi turish uchun oʻzlarining milliy armiyalarini yagona tuzilmaga birlashtirmaydi. Polsha tashqi ishlar vaziri Radoslav Sikorskiy Ukraina prezidenti Volodimir Zelenskiyning bu boradagi taklifiga shunday izoh berdi.

«Bunday terminlarga ehtiyot boʻlish kerak, chunki odamlar turli narsalarni tushunishi mumkin. Agar gap milliy armiyalar birlashuvi haqida ketayotgan boʻlsa, bu sodir boʻlmaydi. Ammo men Evropa Ittifoqining mudofaa imkoniyatlarini rivojlantirishni qoʻllab-quvvatlayman», — deydi vazir.

Sikorskiy, shuningdek, Evropa Ittifoqi mazkur yoʻnalishda tegishli qadamlarni tashlayotgani, kuchaytirilgan brigada tuzayotganini ma'lum qildi. Shu bilan birga, Evropa mudofaasining mustahkamlanishi ham milliy, ham Evropa komponentlarini oʻz ichiga olishi kerakligini ta'kidladi.

Polsha mudofaa vazirining qayd etishicha, Varshava oʻz qoʻshinlarini Ukrainaga yuborish imkoniyatini koʻrib chiqmayapti. U Polshaning NATO doirasidagi asosiy vazifasi — alyansning sharqiy qanotini, ya'ni oʻz hududlarini himoya qilish ekanini eslatib oʻtgan.

Avvalroq Volodimir Zelenskiy xavfsizlik boʻyicha Myunxen konferentsiyasida Evroittifoqni oʻz Qurolli kuchlarini tashkil etishga chaqirgandi. Ukraina prezidenti AQSh Evropani qoʻllab-quvvatlashni qisqartirishi mumkinligidan xavotirini bildirgan: «Evropa oʻz armiyasiga ega boʻlishi kerak. Evropa armiyasi. Men rostdan ham vaqt keldi deb hisoblayman. Evropa Qurolli kuchlari tuzilishi kerak».

Zelenskiy Ukraina armiyasi umumevropa kuchlarining tuzilishiga asos boʻlib xizmat qilishi mumkinligini qoʻshimcha qilgan. «Ukraina armiyasisiz Evropa armiyasi Rossiyani toʻxtata olmaydi. Bu reallik. Armiyamiz zamonaviy urush tajribasiga ega, ammo uning sa'y-harakatlari etarli emas», — deydi u. “Zamin” yangiliklarini “Telegram”da kuzatib boring