AQSH urushga aralashishdan voz kechdimi? Isroil rejasi fosh bo‘ldi

The New York Times nashri ma’lum qilishicha, AQSH sobiq prezidenti Donald Tramp Isroil tomonidan may oyida Eron yadroviy obyektlariga rejalashtirilgan zarbani qo‘llab-quvvatlashdan bosh tortgan. Bu qaror bir necha oy davom etgan ichki muhokamalar va siyosiy tortishuvlardan keyin qabul qilingan.

Manbalarga ko‘ra, Tramp Eron bilan olib borilayotgan yadroviy muzokaralarga ziyon yetkazmaslikni afzal ko‘rgan. Uning oldida ikki yo‘l bor edi: diplomatik hal etish yoki Isroilning harbiy ssenariysini qo‘llab-quvvatlash. Oq uy esa birinchi variantni ma’qul ko‘rdi.

AQSH ma’muriyatida ichki ixtilof

Harbiy tahdid masalasi AQSH hukumati ichida keskin qarama-qarshiliklarni keltirib chiqargan. Qator vazirliklar harbiy choralarni yoqlab chiqqan bo‘lsa, Trampning yordamchilari hujum natijasiga shubha bilan qaragan. Ular Eronga berilgan zarba AQSHni keng qamrovli urushga tortib ketishi mumkinligini ta’kidlashgan.

Oxir-oqibat, umumiy fikr harbiy harakatlardan tiyilish tomonga og‘gan. Bu vaqtda Eron tomoni o‘zini muzokaralarga ochiq ekanini bildirgan.

Isroil hujumga tayyor edi

Isroil matbuoti va xalqaro manbalar xabar berishicha, Isroil mudofaa tuzilmalari Eron yadro infratuzilmasini zarba bilan yo‘q qilish bo‘yicha aniq rejalarni ishlab chiqqan. Bu zarbalar Tehronning yadro dasturini kamida bir yilga kechiktirish maqsadini ko‘zlagan.

Ushbu rejalarning deyarli barchasi AQSHning bevosita ishtirokini nazarda tutgan — xavfsizlik kafolati, havo hujumi samaradorligi va Eronning ehtimoliy javobiga qarshi qo‘llab-quvvatlash.

Aytish joizki, Isroilga allaqachon AQSH tomonidan og‘ir turdagi bombalar — xususan, MK-84 bombalar yetkazilgan. Shuningdek, 3 000 dan ortiq raketa va boshqa hujum qurollari yuborish uchun tayyorlanmoqda.

Trampning prezidentligi davridagi qo‘pol, lekin ehtiyotkor yondashuv bu gal ham o‘zini namoyon qildi. Siyosiy tahlilchilar fikricha, u diplomatik yechimni ustun ko‘rib, AQSHni to‘g‘ridan to‘g‘ri urushga tortishdan saqlangan. “Zamin”ni Telegramʻda oʻqing!