Ukraina Rossiyaning «soyadagi floti»ga zarba berdi: noqonuniy kema hibsga olindi

Ukraina xavfsizlik xizmati (UXX) Rossiyaning «soyadagi floti» tarkibiga kiruvchi xorijiy yuk kemasini Qora dengiz hududida qo‘lga olganini ma’lum qildi. Bu haqda tashkilotning matbuot xizmati xabar tarqatdi.

Maxsus amaliyot Ukraina xavfsizlik xizmati va mamlakat chegara qo‘shinlari hamkorligida, Qora dengiz akvatoriyasining ichki suvlarida o‘tkazilgan. Ammo kemaning aniq qachon ushlangani haqida hozircha aniq ma’lumot berilmagan.

Tergovchilarning taxminiga ko‘ra, ushbu kema 2024 yil oxirida Sevastopol portidan Ukraina janubidagi bosib olingan hududlardan noqonuniy tarzda olib chiqilgan 5 ming tonna bug‘doyni tashib ketgan. Aytishlaricha, bu yuk tashuvchi kema Osiyo davlatlaridan birining bayrog‘i ostida harakatlanib, ushbu reysni yashirin holda amalga oshirgan.

Ukraina xavfsizlik xizmatining xabar berishicha, kemada o‘tkazilgan tintuv jarayonida Rossiya kuchlari tomonidan Ukrainadan qishloq xo‘jaligi mahsulotlarini olib chiqib ketilganligini tasdiqlovchi turli hujjatlar, navigatsiya jihozlari va boshqa ko‘plab daliliy ashyolar topilgan.

Ma’lumot uchun: «soyadagi flot» deganda, xalqaro kuzatuv tizimlari orqali aniqlanmasligi maqsadida signal uzatuvchi mayoqlarini o‘chirib qo‘yadigan eski va yashirin yuk tankerlari tushuniladi. Bunday tankerlar asosan Rossiya davlat korporatsiyasi «Sovkomflot» tomonidan boshqariladi. G‘arb davlatlari tomonidan sanksiyalar kiritilgandan so‘ng, Rossiya 2022 yil oxirida o‘z neft mahsulotlarini belgilangan narxlardan yuqoriroq narxda sotish uchun aynan shunday yashirin flotdan foydalana boshlagan edi.

The Guardian nashrining ma’lumotiga ko‘ra, hozirda Rossiyaning «soyadagi floti» tarkibida taxminan 600 ga yaqin kema mavjud bo‘lib, ular mamlakat neft eksportining 70 foizini amalga oshirib kelmoqda.

Ukraina xavfsizlik xizmati ushbu hibs qilish amaliyotini mamlakat iqtisodiy xavfsizligini ta’minlash, shuningdek, Rossiyaning noqonuniy savdo yo‘llarini to‘sib qo‘yish bo‘yicha muhim qadam sifatida baholamoqda. Bu hodisa xalqaro maydonda ham katta aks sado berishi kutilmoqda. “Zamin”ni Telegramʻda oʻqing!