«Odatdan – shaxsiyatga»: Putinning yoshlikda shakllangan odati hozir ham o‘zgarmagan

Yaqinda efirga uzatilgan «Rossiya. Kreml. Putin. 25 yil» nomli hujjatli filmda Rossiya prezidenti Vladimir Putin o‘zining sport zalidagi shaxsiy mashg‘ulot joyini namoyish etdi. Ammo tomoshabinlarni yanada hayratga solgan jihat — Putinning sport xonalaridan chiqar ekan, chiroqni o‘chirib ketgani bo‘ldi. Bu kichik, lekin ma’nodor harakat keng jamoatchilikda qiziqish uyg‘otdi.

Putinning bu odati tasodifiy emas. Uning sinfdoshi va yaqin do‘sti Viktor Borisenko «KP-Peterburg» gazetasiga bergan intervyusida shu haqda to‘xtalib o‘tdi. Uning so‘zlariga ko‘ra, Putin bu harakatni hali bolalikdan o‘rgangan — bu undagi mas’uliyat tuyg‘usi va tarbiyaviy muhitning samarasi.

Borisenkoning ta’kidlashicha, Putin bolaligini Leningraddagi kommunal kvartiralarda o‘tkazgan. U paytlarda bir necha oila bir xonadonda yashagach, elektr to‘lovlari ham umumiy bo‘lardi. Shunday sharoitda agar kimdir xonani yoritib qo‘ysa va uni o‘chirmasdan chiqsa, boshqa qo‘shnilar bundan norozi bo‘lishi turgan gap. Shu sababli, bolalarga ham chiroqni o‘chirish odat qilib o‘rgatilardi. Putin esa bu odatni katta bo‘lgach ham unutmagan.

«Vladimir o‘shandayoq har qanday yumushda tartib va ehtiyotkorlikka rioya qilardi. U hatto yorug‘likni ham bekorga isrof qilmaslik kerakligini yaxshi bilardi. Uning chiroqni o‘chirib ketishi — tarbiya va o‘tmish xotiralarining ifodasi», — dedi Borisenko.

Bunday oddiy, ammo axloqiy ma’noga ega bo‘lgan odat mamlakat yetakchisining shaxsiy fazilatlaridan biri sifatida qabul qilinmoqda. Rossiyadagi ko‘plab ijtimoiy tarmoq foydalanuvchilari bu holatni «ijtimoiy mas’uliyat timsoli» deb atashdi.

Putinning bu harakatiga faqat ishonchli rahbar sifatida emas, balki oddiy inson sifatida ham qaraydiganlar soni ortib bormoqda. Energiyani tejash, resurslarga ehtiyotkor munosabat va tartib — bular prezident uchun bolalikdan boshlangan hayot falsafasining bir qismi ekani yana bir bor ko‘zga tashlandi.

Bu kichik detal ortida katta ma’no bor: odamning asli kimligi uning oddiy odatlarida aks etadi. Putin misolida esa bu odat nafaqat shaxsiy, balki milliy darajadagi fazilat sifatida namoyon bo‘lmoqda. “Zamin”ni Telegramʻda oʻqing!