Hindistonda yo‘lbarslar dahshati: 8 kunda 8 odam halok bo‘ldi

Hindistonning Maxarashtra shtatida joylashgan Chandrapur okrugida yo‘lbarslar hujumlari aholi uchun jiddiy xavfga aylandi. “Times of India” nashrining xabar berishicha, so‘nggi sakkiz kun ichida yirtqichlar 8 kishining hayotiga zomin bo‘lgan. Yangi yil boshidan beri esa umumiy yo‘lbars hujumlari oqibatida halok bo‘lganlar soni 21 nafarga yetdi.

Har bir kun — yangi halokat

2024 yilda Chandrapurda yovvoyi tabiat bilan bog‘liq 29 ta o‘lim holati qayd etilgan bo‘lsa, 2025 yilning besh oyida 21 holat faqat yo‘lbarslar bilan bog‘liq. Eng oxirgi holat Bxandurna qishlog‘ida yuz berdi. 70 yoshli Rishi Pendor bedarak yo‘qolgach, uning jasadi Tadoba-Andxari qo‘riqxonasi hududidan topildi. Maxalliy ma’lumotlarga ko‘ra, Pendor ruhiy kasallikdan aziyat chekkan va u o‘rmonga yolg‘iz kirgan.

Barg terish o‘limga olib keldi

Navbatdagi qurbon — 63 yoshli Maroti Shende Nagbxid atrofidagi o‘rmonda barg terish paytida yo‘lbars hujumiga uchragan. U og‘ir tan jarohati bilan shifoxonaga olib ketilayotganda vafot etdi.

Davlatdan choralar: niqob va guruh bo‘lib yurish

O‘rmon xo‘jaligi departamenti vaziyat jiddiy ekanini tan oldi va yangi xavfsizlik qoidalarini e’lon qildi. Barg yoki mevalar terayotgan fuqarolarga:

- soat 08:00 dan keyingina o‘rmonga kirish;
- 17:00 gacha chiqib ketish;
- doimo guruh bo‘lib yurish;
- yo‘lbarslarni cho‘chitish uchun yozuvli niqoblar taqish;
kabi tavsiyalar berildi.

Zamin.uz tahririyatidan:
Chandrapurdagi hodisalar inson va yovvoyi tabiat o‘rtasidagi muvozanatning qanday nozik ekanini yana bir bor namoyon etmoqda. Bunday vaziyatlarda nafaqat jon saqlash, balki tabiiy muhitni ham inobatga olgan holda, mas’ul qarorlar qabul qilish juda muhim. Siz ushbu voqealardan qanday xulosa chiqarasiz? “Zamin”ni Telegramʻda oʻqing!