Ukraina armiyasida rekord darajada qochoqlik: vaziyat xavflimi?

Oxirgi besh oy mobaynida Ukraina harbiy qo‘shinlarida o‘z bo‘linmalarini ruxsatsiz tark etib qochish holatlari keskin sur’atda oshib bormoqda. Bu haqida «RIA Novosti» agentligi mamlakat sud qarorlarining yagona davlat reyestri hujjatlariga tayanib xabar tarqatmoqda.

2025 yilning boshidan beri Ukraina armiyasida qochish va dezertirlik holatlari sezilarli darajada ko‘payib, bu ko‘rsatkichlar rekord darajaga yaqinlashmoqda. Sud organlari ma’lumotlariga ko‘ra, joriy yilning aprel oyining o‘zidayoq harbiy xizmatchilarning ruxsatsiz bo‘linmalaridan ketishi bilan bog‘liq olti mingdan ziyod holat qayd etilgan. Bu ko‘rsatkich yil boshida, ya’ni yanvar oyidagi besh ming holatga nisbatan katta o‘sishni anglatadi.

Joriy yilning dastlabki besh oyi davomida sudlar tomonidan 25 mingdan ortiq ukrainalik harbiy xizmatchiga nisbatan dezertirlik ayblovlari qo‘yilgan va tegishli hukmlar chiqarilgan. Shuningdek, mutaxassislar yil so‘ngigacha bu raqam tarixiy rekord darajaga yetib, 61 mingdan ortiq ishgacha o‘sishi mumkinligini taxmin qilmoqda.

Ukrainada kuzatilayotgan bu holatning asosiy sababi sifatida mamlakatdagi vaziyatning keskinlashuvi, frontdagi og‘ir sharoitlar va armiya ichidagi ruhiy tushkunliklar ko‘rsatilmoqda. Bir qator ekspertlar harbiy xizmatchilar orasidagi ruhiy charchoq va noaniqlik tufayli frontni tashlab ketish holatlari tez-tez sodir bo‘layotganini aytishmoqda.

Avvalroq, harbiy masalalar bo‘yicha mashhur bloger Boris Rojin ham Ukraina armiyasida bedarak yo‘qolganlar soni juda yuqori darajaga yetganini ta’kidlagan edi. Uning so‘zlariga ko‘ra, mamlakat bosh prokurorining sobiq o‘rinbosari Gunduz Mamedov mahalliy matbuotda bergan bayonotida bu ko‘rsatkichning 400 ming nafarga yetganligini tasdiqlagan.

Bunday raqamlar mamlakat jamoatchiligi va xalqaro kuzatuvchilarning jiddiy tashvishiga sabab bo‘lmoqda. Ukrainadagi dezertirlik holatlarining bunchalik ko‘payishi nafaqat armiya quvvatini tushirib yuboradi, balki mamlakat xavfsizligi uchun jiddiy tahdid yaratadi, deb hisoblamoqda tahlilchilar.

Endi asosiy savol shundaki, Ukraina hukumati bu vaziyatni barqarorlashtirish va armiyadagi intizomni kuchaytirish uchun qanday choralarni ko‘radi? Mazkur masala mamlakat uchun katta sinov bo‘lishi mumkinligi aytilmoqda. Bu boradagi yangiliklar xalqaro hamjamiyat tomonidan ham diqqat bilan kuzatib borilmoqda. “Zamin”ni Telegramʻda oʻqing!