Yaponiya guruch zaxirasini yana qisqartiradi: bozorda barqarorlik izidan

Yaponiya hukumati ichki bozorda guruch yetishmovchiligini bartaraf etish maqsadida davlat zaxirasidan qo‘shimcha 200 ming tonna guruch ajratishga qaror qildi. Bu haqda mamlakat Qishloq xo‘jaligi vaziri Sindziro Koidzumi ma’lum qildi, deb xabar bermoqda Kyodo News nashri.

Ma’lum qilinishicha, ushbu miqdordagi guruch chakana savdo tarmoqlari — kichik supermarketlar, ixtisoslashgan do‘konlar va yirik chakana savdo operatorlariga to‘g‘ridan to‘g‘ri shartnomalar orqali tarqatiladi. Qishloq xo‘jaligi vazirligi arizalarni chorshanba kunidan boshlab qabul qilishini bildirgan.

Oldingi ma’lumotlarga ko‘ra, Yaponiyadagi davlat guruch zaxiralari 910 ming tonnani tashkil etgan. Biroq, mart va aprel oylarida o‘tkazilgan kimoshdi savdolaridan so‘ng zaxiralar tezlik bilan kamayib, hozirgi kunda 100 ming tonna atrofida qoldi. Bu esa ba’zi tahlilchilarni favqulodda vaziyatlar vaqtida yetarlicha oziq-ovqat mahsuloti bo‘lmasligi mumkinligi haqida ogohlantirdi.

Mamlakat aholisi o‘tgan yozdan beri do‘konlarda guruch yetishmasligi bilan bog‘liq qiyinchiliklarni boshdan kechirmoqda. Natijada guruch narxlari keskin oshdi — joriy yildagi narxlar o‘tgan yilga nisbatan deyarli ikki barobarga qimmatlashgan.

Yaponiya hukumati tomonidan ko‘rilayotgan bu choralar aholi orasida xavotirni kamaytirish va ichki bozorda narxlarni barqarorlashtirishga qaratilgan. Mutasaddilar bu orqali guruchni tezkor va maqsadli yetkazib berishni ta’minlash niyatida. “Zamin”ni Telegramʻda oʻqing!