Isroil va Eron o‘rtasidagi keskinlik elchixonalarni yopilishiga sabab bo‘ldi

Yaqin Sharqda avj olgan ziddiyatlar tufayli Isroil va Eron o‘rtasidagi munosabatlar yanada taranglashmoqda. 13 iyun, jumaga o‘tar kechasi Isroil Eron hududidagi bir qator muhim obyektlarga, jumladan, Tehron shahri va Natanz yadro markaziga kuchli zarbalar berdi. Bu hujumlar nafaqat mintaqada, balki butun dunyoda siyosiy va diplomatik faoliyatga jiddiy ta’sir ko‘rsatdi.

So‘nggi voqealar ortidan Isroilning dunyoning turli mamlakatidagi elchixonalari va konsulliklari yopiq holatda qolmoqda. Isroil diplomatik vakolatxonalari rasmiy veb-saytlarida tarqatilgan xabarda: «So‘nggi voqealarni hisobga olgan holda, Isroilning butun dunyo bo‘ylab vakolatxonalari yopiqligicha qolmoqda, konsullik xizmatlari vaqtincha ko‘rsatilmayapti», — deyiladi.

Ushbu e’lonlar AQSH, Buyuk Britaniya, Shvetsiya, Norvegiya, Fransiya, Nigeriya, Rossiya va Ukrainadagi Isroil elchixonalari rasmiy portallarida ham joylashtirildi. Bu, o‘z navbatida, ko‘plab davlatlar vakillari, shuningdek, elchixonaga murojaat qiluvchi fuqarolar uchun noqulayliklar tug‘dirdi.

Avvalroq, Isroil harbiylari Erondagi bir nechta strategik ahamiyatga ega bo‘lgan nishonlarga zarba bergani, xususan, Tehron va Natanzdagi yadro inshootlari hamda boshqa obyektlar ustidan raketa va uchuvchisiz uchoqlar orqali hujum uyushtirgani ma’lum qilingan edi. Eron tomonidan esa, ushbu hujumlar javobsiz qoldirilmasligi va bu harakatlar "urush e’lon qilish" sifatida baholanishi aytildi. Ayni paytda, Eron Oliy Rahbari oyatulloh Ali Xomanaiy Isroilga dahshatli oqibatlar bilan tahdid qildi, Prezident Ma’sud Pezeshkiyon esa mamlakat Isroilni o‘z qilmishidan afsuslanishiga majbur etishini ta’kidladi.

Eron axborot agentliklari xabariga ko‘ra, hujumlar chog‘ida mamlakat qurolli kuchlari bosh shtabi boshlig‘i Muhammad Bag‘iriy va Islom inqilobi muhofizlari korpusi qo‘mondoni Husayn Salamiy halok bo‘lgan. Bu kabi yirik yo‘qotishlar mamlakatda va xalqaro maydonda katta muhokamalarga sabab bo‘lmoqda.

Boshqa bir muhim jihat shundaki, Isroil armiyasi ma’lumotlariga ko‘ra, 13 iyun kuni Eron Isroilga qarshi kamida 100 ta uchuvchisiz uchoq uchirgan. Ularning aksariyati Isroilning mustahkam havo mudofaa tizimlari tomonidan yo‘q qilingan bo‘lsa-da, ayrimlari mamlakat hududiga yetib borgan.

Xalqaro hamjamiyat esa vaziyatni yumshatish va taraflarni sabr-toqatli bo‘lishga chaqirmoqda. Bir vaqtning o‘zida, Isroil Bosh vaziri Binyamin Netanyahu harbiy amaliyotlar bir necha kun davom etishi mumkinligini bildirdi va mamlakat xavfsizligini ta’minlash uchun barcha choralar ko‘rilishini aytdi.

Vaziyat hozirda nihoyatda keskin va noaniq bo‘lib qolmoqda. Dunyoning ko‘plab davlatlaridagi Isroil diplomatik vakolatxonalari o‘z faoliyatini to‘xtatgani, muxlislar va kuzatuvchilar uchun ham xavotirli voqea bo‘lib turibdi. Yangi ma’lumotlar paydo bo‘lishi bilan Zamin.uz muxlislariga eng so‘nggi yangiliklarni yetkazishda davom etamiz. “Zamin”ni Telegramʻda oʻqing!