Trampdan oltin smartfon va yangi tarmoq: narx baland, xoslik past

AQSHning sobiq prezidenti Donald Trampga tegishli Trump Organization kompaniyasi yangi mobil aloqa tarmog‘i va smartfon ishlab chiqarishini e’lon qildi. Kompaniya “Trump Mobile” nomli operator va “T1” deb nomlangan mobil qurilma orqali raqobat bozoriga qadam tashlamoqda. Bu haqda texnologik yangiliklar sohasida yetakchi manbalardan biri — The Verge xabar tarqatdi.

Trump Mobile – milliy brendmi yoki PR loyixami?

Tarmoqning bosh tarif rejasi oyiga $47,45 bo‘lib, faqatgina cheksiz aloqa va internetni o‘z ichiga oladi. Bu narx boshqa yirik AQSH operatorlari — Verizon, T-Mobile yoki AT&T'ning analog tariflaridan ancha yuqori ekani alohida qayd etilgan. Masalan, T-Mobile kabi yetakchi operatorlar xuddi shunday xizmatlarni oyiga $35–$40 atrofida taklif etmoqda.

Trump Mobile tomonidan ishlab chiqilayotgan T1 smartfoni esa 499 dollardan sotuvga chiqadi. Eng qizig‘i, u “nozik oltin qoplamada” taklif etiladi, ammo texnik jihatdan yetakchi smartfonlardan orqada ekanligi The Verge tahlilchilari tomonidan tanqid qilindi.

AQSHda ishlab chiqarilgan, lekin Apple emas

T1 smartfoni to‘liq AQSH hududida ishlab chiqarilayotgani e’lon qilindi. Bu mamlakatdagi ishlab chiqarishni qo‘llab-quvvatlash shiori ostida amalga oshirilayotgan bo‘lsa-da, qurilmaning texnik jihatdan Apple, Samsung yoki Google Pixel kabi raqobatchilariga yaqinlasha olmasligi ehtimoli katta. Bu esa uning bozordagi muvaffaqiyatini shubha ostiga qo‘yadi.

Trump Organization vitse-prezidenti Erik Tramp ushbu loyiha haqida shunday dedi:

“Trump Mobile uyali telefonlar va mobil aloqada inqilob qilmoqchi. Bu — erkin so‘z va milliy texnologik mustaqillikka qaratilgan qadam.”

Raqobatda ustunlik qilish qiyin

Ekspertlar ta’kidlashicha, har qancha PR va “patriotik” shiorlarga qaramay, bu loyiha Apple yoki Samsung kabi yirik brendlar fonida kuchli texnik afzalliklar taqdim etmasa, bozorda o‘z o‘rnini topishi mushkul bo‘ladi. Ayniqsa, narxlardagi katta farq va texnik jihatdan innovatsiyaning yo‘qligi Trump Mobile'ni “nishonli, lekin amaliyotda zaif” loyihaga aylantirishi mumkin.

Xulosa
Trump Mobile va T1 smartfoni – siyosiy imij va texnologik bozor o‘rtasidagi yangi sinovdir. Bu mahsulotlar patriotik ruhda taqdim etilmoqda, lekin ularning haqiqiy samaradorligi, qulayligi va bozorda o‘z o‘rnini topa olish-olmasligi hali katta savol ostida. Ishonch bilan aytish mumkinki, mobil aloqa sohasida PR kampaniyadan ko‘ra, texnik jihatlar va xizmat sifati ko‘proq ahamiyat kasb etadi. “Zamin”ni Telegramʻda oʻqing!