Eron Isroildagi xususiy kameralar orqali hujum natijasini kuzatmoqda

Jahon hamjamiyati diqqat markazida turgan Isroil va Eron o‘rtasidagi tobora keskinlashayotgan nizo kiberhujumlar maydonida ham yangi bosqichga o‘tdi. Bloomberg nashrining xabar berishicha, so‘nggi kunlarda Eron maxsus xizmatlari Isroildagi xususiy videokuzatuv kameralariga urinishlar orqali raketalarning aniqligi va natijadorligini tahlil qilmoqda.

Isroil Milliy kiberboshqaruvi bosh direktorining sobiq o‘rinbosari Rafael Franko ushbu tahdid haqida shunday deydi:

“So‘nggi ikki-uch kun ichida eronliklar o‘z hujumlari natijasini kuzatish, zarba berish nuqtalarini aniqlash va tuzatish kiritish maqsadida kameralarga ulanishga harakat qilmoqda”.

Mutaxassislar ta’kidlashicha, videokuzatuv tizimlarining xavfsizligi hanuz ko‘plab foydalanuvchilar uchun ustuvorlik emas. Energetika xavfsizligi sohasida faoliyat yurituvchi ekspert Pleg Vasserman bu haqda quyidagicha izoh berdi:

“Ko‘pchilik kamera tanlaganda narxga qaraydi, xavfsizlikka emas. Lekin kameralar shaxsiy foydalanishdan tashqarida, butun shaharni qamrab oladigan ma’lumotlarni ham tarqatishi mumkin. Bu esa dushman uchun nihoyatda foydali axborot manbaiga aylanadi”.

Ayni paytda, Isroildagi rasmiylar ham aholini o‘z shaxsiy kameralarini himoyalashga chaqirishmoqda. Jamoat radiosida chiqish qilgan kiberxavfsizlik mutaxassislari odamlarni parollarni yangilash, himoya quvvatini oshirish yoki zarurat bo‘lsa — ularni vaqtincha o‘chirib qo‘yishga chaqirmoqda.

Bloomberg manbalariga ko‘ra, 2023 yil 7 oktyabrdagi HAMAS hujumi oldidan ham shahar infratuzilmalariga joylashtirilgan videokuzatuv kameralariga ruxsatsiz kirish holatlari qayd etilgan. Bu esa ushbu sxemaning avval ham qo‘llanilganini anglatadi.

Ma’lumki, 13 iyun kuni Isroil hukumati “Isyonkor sher” nomli operatsiyani amalga oshirib, Eronning yadro obyektlariga zarba bergan. Bundan so‘ng Islom Respublikasi javob zarbasini yo‘lladi. Bir necha kundan beri ikki davlat o‘rtasida o‘zaro zarbalar va kiberhujumlar to‘xtayotgani yo‘q.

Bu voqealar fonida hozirgi global raqamli dunyoda kiberxavfsizlikning ahamiyati yanada oshgani ayon bo‘lmoqda. Har qanday xususiy yoki jamoat kameralari — keng miqyosdagi harbiy amaliyotlarda “ko‘rinmas ko‘z”ga aylanishi mumkin.

Tahlilchilarga ko‘ra, kameralar orqali axborot yig‘ish va zarba natijalarini tahlil qilish bugungi kunda harbiy strategiyaning ajralmas qismiga aylangan. “Zamin”ni Telegramʻda oʻqing!