Belarusda “Oreshnik” gipertovushli raketasi joylashtiriladi: yangi davr boshlanyaptimi?

Rossiya harbiy sanoatining eng so‘nggi yutuqlaridan biri — “Oreshnik” gipertovushli ballistik raketa tizimi yaqin haftalarda Belarus hududiga rasman kirib keladi, deb xabar berdi aa.com. Bu haqda prezident Aleksandr Lukashenko Mustaqillik kuniga bag‘ishlangan tantanali yig‘ilishda alohida to‘xtalib o‘tdi. Uning ta’kidlashicha, “Oreshnik” raketalarining ilk pozitsiyalari mamlakatda joylashtiriladi va yil oxiriga qadar to‘liq faoliyat boshlaydi.

Lukashenko bu qarorni Rossiya prezidenti Vladimir Putin bilan Volgograddagi muzokaralar chog‘ida shaxsan kelishib olganini aytdi. “Oreshnik”ning texnik imkoniyatlari sinovlarda to‘liq namoyon bo‘lgani va Belarus xavfsizligini kuchaytirishda katta ahamiyat kasb etishini ta’kidladi. Unga ko‘ra, bu harbiy qadam mamlakatning suvereniteti va tashqi xavf-xatarlarga qarshi mudofaa salohiyatini mustahkamlashga xizmat qiladi.

“Oreshnik” — bir nechta jangovar kallakka ega, har ikkala yadroviy va oddiy qurol variantida ishlatiladigan gipertovushli ballistik raketa. Kompleksning uchish radiusi 5500 km ni tashkil qiladi va u zamonaviy harbiy texnologiyalarning eng ilg‘or namunalaridan biri sifatida ko‘rilmoqda. Raketaning Belarusda joylashtirilishi nafaqat mintaqaviy, balki xalqaro darajadagi strategik muvozanatga ham ta’sir qilishi kutilmoqda.

Ekspertlar fikricha, bu qadam Belarus uchun harbiy va siyosiy jihatdan yangi bosqich boshlanishini anglatadi. Yangi gipertovushli raketalar mamlakat mudofaa tizimini kuchaytirish bilan birga, tashqi tahdidlarga qarshi barqaror pozitsiyani ta’minlashi mumkin.

Yaqin haftalarda “Oreshnik” tizimining qanday joylashtirilishi, mintaqaviy xavfsizlikka qay darajada ta’sir ko‘rsatishi va xalqaro maydonda qanday baholanishi barcha uchun katta qiziqish uyg‘otmoqda. Bir narsa aniq: Belarus xavfsizlik doktrinasida yangi sahifa ochilayapti va mamlakatning mudofaa siyosatida jiddiy o‘zgarishlar boshlanishi ehtimoldan holi emas. “Zamin”ni Telegramʻda oʻqing!