Interpol qidiruvidagi mafiyachi kokain kontrabandasida ushlandi

Janubiy Amerikadagi yirik mafiya operatorasi qo‘lga olindi. Kolumbiya politsiyasi Lotin Amerikasida faoliyat yuritgan va Yevropaga giyohvand moddalar yetkazib berish zanjirini boshqargan italiyalik Juzeppe Palermoni hibsga oldi, deb xabar berdi AP.

Ma’lum qilinishicha, u nafaqat Italiyadagi, balki xalqaro darajada eng xavfli jinoiy tuzilmalardan biri – “Ndrangeta” mafiyasi yetakchilaridan biri hisoblanadi. U Peppe taxallusi bilan ham mashhur bo‘lib, Interpol tomonidan xalqaro qidiruvga berilgan.

Kolumbiya, Italiya, Buyuk Britaniya va Yevropol huquq-tartibot organlari hamkorligida o‘tkazilgan maxsus operatsiya chog‘ida Palermo poytaxt Bogotada jamoat joyida ushlangan. Bu hibsga olish nafaqat Kolumbiya, balki butun Yevropa uchun katta muvaffaqiyat sifatida baholanmoqda.

Kolumbiya politsiyasi boshlig‘i Karlos Fernando Triana ma’lum qilishicha, Juzeppe Palermo Janubiy Amerikadan Yevropaga kokain yetkazib berish zanjirida hal qiluvchi figura bo‘lgan. U Kolumbiya, Peru va Ekvadorda kokain va boshqa giyohvand moddalarni sotib olish, saqlash va tarqatishni boshqargan. Shuningdek, dengiz va quruqlik orqali Yevropa bozoriga yetkazib berish yo‘llarini nazorat qilgan.

Bunday transmilliy faoliyat “Ndrangeta” mafiyasining xalqaro miqyosdagi ta’sirini yana bir bor ko‘rsatdi. Italiyaning Kalabriya mintaqasida asos solingan ushbu guruh, hozirda dunyodagi eng boy va yopiq mafiya tuzilmalaridan biri sifatida baholanadi. Ular asosan kokain savdosi, pul yuvish va noqonuniy qurol savdosi bilan tanilgan.

BMTning 2023 yilgi ma’lumotlariga ko‘ra, global noqonuniy kokain ishlab chiqarish hajmi 3708 tonnaga yetgan, bu esa 2022 yilga nisbatan 34 foizga ko‘pdir. Bunday o‘sish, asosan, Kolumbiyadagi koka plantatsiyalarining kengayishi bilan izohlanmoqda. Ekspertlar hisob-kitobiga ko‘ra, faqat kokain bozorining o‘zi yillik 500 milliard dollardan ortiq aylanmaga ega.

Mafiya yetakchisi Juzeppe Palermoning ushlanishi xalqaro giyohvand moddalar zanjiriga kuchli zarba bo‘ldi, deyishmoqda mutaxassislar. Uning ishi endi xalqaro sud muhokamalariga o‘tadi. Unga nisbatan ko‘p sonli davlatlarda jinoiy ayblovlar qo‘yilishi kutilayotgani bois, bu jarayon jahon jamoatchiligining diqqat markazida bo‘lib turishi aniq. “Zamin”ni Telegramʻda oʻqing!