Yevropol Fransiya politsiyasi bilan hamkorlikda Ukrainada faoliyat ko‘rsatib kelayotgan rus tilidagi XSS.is xakerlik forumining ma’murini qo‘lga oldi. 2013 yildan beri anonim xakerlar forumlari orasidagi eng muhim resurslardan biri bo‘lib kelgan XSS.is, 50 mingdan ortiq foydalanuvchiga ega ekan.
XSS.is forumidan xakerlar, xususan, xakerlik vositalari, o‘g‘irlangan ma’lumotlar va noqonuniy xizmatlarni sotish uchun foydalangan. Yevropolning bayonotida bu forum global kiberjinoyatchilikka katta ta’sir ko‘rsatgani ta’kidlanadi.
Fransiya tomonidan 2021 yilda boshlangan uzoq muddatli tergov Yevropa Ittifoqi bilan yaqin hamkorlikda olib borildi. Kiyevda ushbu forum ma’muri sifatida faoliyat yuritgan shaxs qo‘lga olingan.
Yevropol ma’lumotlariga ko‘ra, ushbu shaxs jinoiy faoliyatni tashkil qilishda muhim rol o‘ynagan. U jinoyatchilar o‘rtasidagi kelishmovchiliklarni hal qilish va bitimlar xavfsizligini kafolatlash uchun vositachi bo‘lgan. Shuningdek, u kiberjinoyatchilar uchun maxsus onlayn muloqotni ta’minlovchi thesecure.biz servisini ham boshqargan deb taxmin qilinmoqda.
Ushbu qo‘lga olish global kiberxavfsizlikka qarshi kurashda muhim qadam bo‘lib, kiberjinoyatchilikni yo‘q qilishga bo‘lgan muvaffaqiyatli harakatni ko‘rsatadi.
