Eronning oliy rahbari Ali Xomanaiy so‘nggi chiqishida AQSH va G‘arb davlatlari bilan munosabatlardagi asosiy muammolarga to‘xtalib o‘tdi. Uning ta’kidlashicha, Amerika yadro dasturi, uranni boyitish yoki inson huquqlari kabi mavzularni bahona qilib, aslida Eronning islomiy e’tiqodi va mafkurasiga qarshi kurash olib bormoqda.
Ali Xomanaiy shunday dedi: “Ular yadro muammosi, uranni boyitish, inson huquqlari va shunga o‘xshash narsa deb ataydigan masalalarni ko‘tarishadi, ammo bu faqat bahona. Ular aslida bizning e’tiqodimiz va ta’limotimizga rozi emaslar”. U bu so‘zlar orqali tashqi bosimlar Eronning ichki qudrati va ishonchini sinashga qaratilganini qayd etdi.
Rahbarning fikricha, so‘nggi yillarda yuz bergan harbiy ziddiyat va murakkab vaziyatlar ham mamlakatning mustaqil irodasi va tizimning mustahkamligiga yaqqol misol bo‘ldi. Ali Xomanaiy: “Oxirgi urush Islom Respublikasi irodasi va qudratining namoyon bo‘lishi bilan birga tizim asoslarining o‘ziga xos mustahkamligini ham ko‘rsatdi. Dushmanlarga qaramay, biz Eronni taraqqiyot va shon-shuhrat cho‘qqilariga olib chiqa olamiz”, – deb qo‘shimcha qildi.
Mutaxassislar ta’kidlashiga ko‘ra, Eron–AQSH o‘rtasidagi asosiy qarama-qarshiliklar, ayniqsa, ideologik va e’tiqodiy maydonda to‘planib bormoqda. Shuning uchun, ikki davlat munosabatlarida diplomatik va siyosiy bosimlar saqlanib qolishi tabiiy hol sifatida baholanmoqda.
Eron rahbariyati esa, mamlakatni tashqi bosimlar va tahdidlarga qaramasdan, yanada rivojlantirish va xalqaro maydonda o‘z o‘rnini mustahkamlashga intilmoqda. Jamoatchilik esa, bu jarayonning qay tarzda davom etishini va kelgusida qanday natijalar bo‘lishini katta qiziqish bilan kuzatishmoqda.
