Rossiya armiyasi oldinga siljishda davom etar ekan, Ukraina sharqidagi Dobropilliya shahri aholisi o‘z uylarini tashlab chiqishga majbur bo‘lmoqda. Bir paytlar tinch va mehnatkash konchilar shahri bo‘lgan Dobropillia bugun urush tahdidi ostida.
Evakuatsiya qilinayotgan fuqarolar orasida Liubov ismli ayol ham bor. U avtobusda ko‘z yoshlarini arta turib shunday deydi:
“Bir joyda yashab, keyin o‘sha joyni tark etish og‘ir. Ammo nima qila olaman? Hech nima.”
2024-yil boshida front chizig‘i Dobropilliyadan 50 kilometr uzoqlikda bo‘lgan bo‘lsa, bugunga kelib bu masofa atigi 15 kilometrga qisqardi. Bu yaqinlik shaharga nishonga olingan kamikadze dronlar va og‘ir bombalarning yetib kelishiga sabab bo‘lmoqda. 16 iyul kuni shaharning asosiy savdo markaziga tashlangan yarim tonnalik rus bombasidan ikki kishi halok bo‘ldi, 20 dan ortiq odam yaralandi.
Mahalliy yordam tashkiloti “Proliska” vakili Denys Naumovning so‘zlariga ko‘ra, vaziyat oxirgi ikki hafta ichida keskin yomonlashgan.
“So‘nggi paytlarda evakuatsiya jarayonida ham portlashlar eshitilyapti,” dedi u. Unga ko‘ra, so‘nggi ikki hafta ichida shahardan 1 250 nafardan ortiq odam evakuatsiya qilingan.
Xalqaro hamjamiyatdagi siyosiy bayonotlar esa, mahalliy aholi orasida umid uyg‘otmayapti. AQSh Prezidenti Donald Tramp Rossiyaga qarshi iqtisodiy bosim kuchaytirishini aytgan bo‘lsa-da, Liubov bunga ishonmaydi:
“Hech kimga ishonmayman, hech narsani eshitgim ham kelmaydi,” deydi u boshini chayqab.
Hozircha Dobropilliyadagi vaziyat izchil ravishda og‘irlashib bormoqda. Shahar aholisi, ayniqsa bolalar, keksalar va nogironlar uchun xavfsiz hududlarga ko‘chirish ishlari davom ettirilmoqda.
“Zamin”ni Telegramʻda oʻqing!
