Rossiya–Ukraina urushi boshlanganidan beri Checheniston rahbari Ramzon Qodirov va uning qarindoshlari hayratlanarli darajada ko‘p mukofotlarga sazovor bo‘lishgan. Bu haqda “Verstka” manbasi o‘z tahlillarida ma’lum qildi.
Ma’lumotlarga qaraganda, so‘nggi 41 oy davomida Qodirov shaxsan o‘zi 31 ta orden va medalga ega bo‘lgan. Bu deyarli har 40 kunda bir marta mukofotga loyiq ko‘rilganini anglatadi. Bu jarayon nafaqat uning shaxsini, balki uning oila a’zolarini ham qamrab olgan.
Reytingning ikkinchi o‘rnida uning o‘g‘li Adam Qodirov joy olgan. U 16 ta mukofotga ega bo‘lgan va ularning yarmi atigi ikki oy ichida – 2023 yilning oktyabr va noyabr oylarida topshirilgan. Ushbu davr Adam Grozniyda tergov izolatorida mahbus Nikita Juravelni kaltaklagani bilan bog‘langan. Shu voqeadan so‘ng unga mukofotlar borib turgani ko‘pchilikda ajablanish uyg‘otgan.
Uchinchi o‘rinda esa Qodirovning qizi – Ayshat Qodirova. U 2022 yildan buyon 10 ta davlat mukofotiga sazovor bo‘lgan. Bu mukofotlar oilaviy va siyosiy nufuzni ko‘rsatuvchi yana bir ko‘rsatkich sifatida baholanmoqda.
Qiziqarlisi, jami 146 ta mukofotning 82 tasi Chechenistonning mahalliy, ya’ni ichki mukofotlaridir. Qolganlari esa federal darajadagi vazirliklar va idoralar, xususan Rosgvardiya, IIV va FSIN singari kuch tuzilmalari tomonidan berilgan. Bu esa Qodirovlar oilasining Rossiyadagi davlat tuzilmalari bilan qanchalik yaqin aloqada ekanini ko‘rsatadi.
Bundan tashqari, ular Ukrainaning anneksiya qilingan hududlaridagi ma’muriyatlar, ayrim xorijiy davlatlar – Liviya va Janubiy Osetiya rasmiylari tomonidan ham mukofotlangan.
Adam Qodirovga doimiy ravishda berilayotgan orden va nishonlar internetda hazil va memlarga ham sabab bo‘lmoqda. Medialarda e’lon qilinayotgan mukofotlash to‘g‘risidagi xabarlar nafaqat tanqidiy fikrlarga, balki yumoristik munosabatlarga ham sabab bo‘ldi.
“Verstka”ning ta’kidlashicha, ko‘p hollarda bu mukofotlar Checheniston rasmiylarining to‘g‘ridan to‘g‘ri so‘rovi bilan amalga oshiriladi. Masalan, 2023 yil oktyabr oyida Qodirov ma’muriyati Qabarda-Bolqoriya va Adigeya hukumatlaridan Adamga orden berishni iltimos qilgan. Boshida bu so‘rov rad etilgan bo‘lsa-da, bir oy o‘tgach, Adam Qabarda-Bolqoriyaning eng yuqori mukofotini olgan.
Ko‘rinib turibdiki, mukofotlar soni bu yerda shunchaki raqamlar emas – ular orqasida katta siyosiy uyg‘unlik, ta’sir va imidj qurilishi bor. Ammo shu bilan birga, bu holat ko‘pchilikda turli savollarni ham uyg‘otmay qolmayapti. Balki eng katta savol — bu mukofotlar qanchalik haqiqiy xizmat uchun berilmoqda?
