Qozog‘istonning Olmaota shahrida politsiya jamoat joyida axloqsiz xatti-harakatlarini videoga olgan va ijtimoiy tarmoqlarda tarqatgan bloger ayolga nisbatan tekshiruv o‘tkazdi. Bu haqda shahar politsiyasi matbuot xizmati ma’lum qildi, deb xabar berdi mahalliy nashrlar.
Ma’lumotlarga ko‘ra, A.A. ismli bloger O‘zbekistondagi metro poyezdlaridan birida yo‘lovchilarga nisbatan noo‘rin harakatlar qilib, bu holatni telefonga yozib olgan va keyin shaxsiy sahifalariga joylashtirgan. Videolar ijtimoiy tarmoqlarda katta muhokamaga sabab bo‘ldi.
Huquqni muhofaza qiluvchi organlar ushbu holatni mayda bezorilik sifatida baholab, ma’muriy ish qo‘zg‘atgan. Hozirda materiallar sud ko‘rib chiqishi uchun yuborilgan. Huquq-tartibot organlari bildirishicha, mazkur shaxs avval ham shunday axloqqa zid harakatlar bilan e’tibor markazida bo‘lgan va u bilan profilaktik suhbat o‘tkazilgan edi.
“Biroq, ko‘rinib turibdiki, u o‘tgan voqealardan xulosa chiqarmagan. Bunday xatti-harakatlar jamiyatning ma’naviy qadriyatlariga hurmatsizlikni anglatadi va jamoat joylarida qabul qilingan xulq-atvor me’yorlarini buzishdir”, — deyiladi politsiya ma’lumotida.
Huquqni muhofaza qiluvchi organlar jamoat joylarida axloqsiz yoki provokatsion xatti-harakatlar uchun javobgarlik belgilanganini yana bir bor eslatdi. Ular fikricha, internet orqali bunday videolarning tarqalishi nafaqat shaxsiy obro‘ga, balki jamoat axloqiga ham jiddiy ta’sir ko‘rsatadi.
Shu munosabat bilan politsiya fuqarolarni jamoat joylarida o‘zini odob doirasidan chiqmagan holda tutishga, ijtimoiy tarmoqlarda esa kontent joylashtirishda mas’uliyatni unutmaslikka chaqirdi.
Ekspertlar ta’kidlashicha, so‘nggi paytlarda internet orqali provokatsion kontent orqali obro‘ orttirishga urinish holatlari ko‘paygan. Lekin bu kabi harakatlar nafaqat axloqiy me’yorlarga zid, balki qonun nuqtayi nazaridan ham jazoga sabab bo‘ladi.
Shu bilan birga, axborot sohasi mutaxassislari ijtimoiy tarmoqlar orqali tarqaladigan har bir videoning jamoat tafakkuriga ta’sirini hisobga olish lozimligini ta’kidlamoqda. Ular ta’biricha, “layk” va “prosmotr” uchun axloqni qurbon qilish jamiyatda xatarli tendensiyani kuchaytiradi.
Olmaota politsiyasi hozirda ishni sud ko‘rib chiqishidan oldin qo‘shimcha ma’lumotlar to‘playotganini ma’lum qildi. Sud qaroridan keyin blogerga ma’muriy jazo yoki katta jarima tayinlanishi mumkin.
Bu voqea internetdagi “axloq me’yorlarini unutgan kontent” haqidagi bahslarni yanada jonlantirdi. Jamoatchilik va huquqshunoslar bunday holatlarga nisbatan qattiqroq choralar ko‘rish lozimligini ta’kidlamoqda.
“Zamin”ni Telegramʻda oʻqing!
