AQSh yadro sinovlarini qayta boshlaydi

AQSh prezidenti Donald Tramp Pentagonni yadro qurollarini sinovdan o'tkazishni zudlik bilan qayta boshlashga majbur qiluvchi ko'rsatma berdi. Ushbu qaror "Truth Social" ijtimoiy tarmog'i orqali e'lon qilinib, mamlakatning ko'p yillik qurol nazorati siyosatidan keskin burilishining belgisi sifatida baholanmoqda.

Tramp o'z bayonotida AQSh dunyodagi eng yirik yadro arsenaliga ega ekanligini va bu qurollar uning birinchi prezidentlik muddati davomida to'liq modernizatsiyadan o'tkazilganini ta'kidladi. "Ulkan vayronkorlik kuchi sababli bu ishni qilish og'ir edi, ammo boshqa chora qolmadi!", — dedi u va bu qadamni zaruriy choralar sifatida ko'rsatdi.

Bunday qarorning sababi sifatida boshqa yadro qudratlarining faolligi keltirildi. "Boshqa davlatlar o'z sinov dasturlarini amalga oshirayotganini inobatga olib, Men Mudofaa vazirligiga yadro qurollarimizni sinovdan o'tkazishni boshlashni buyurdim.

Bu jarayon darhol boshlanadi", — deyiladi bayonotda. Tramp, shuningdek, kuchlarning joylashuvi haqida gapirar ekan, "Rossiya ikkinchi o'rinda, Xitoy esa ancha orqada, ammo besh yil ichida bizni quvib yetishi mumkin", deya qo'shimcha qildi.

Bu bayonot AQShning 1992 yildan beri davom etib kelayotgan yadro sinovlarini to'xtatish siyosatidan voz kechishini anglatadi. Xalqaro kuzatuvchilar va Reuters axborot agentligi hozircha qanday turdagi sinovlar rejalashtirilayotganini aniq tushuntirib bera olmaganini qayd etmoqda.

Ikkita asosiy variant ko'rib chiqilmoqda: yadro portlash sinovlari yoki yadro kallaklarini tashishga qodir raketa tizimlarining parvoz sinovlari. Trampning bu qarori Xitoy rahbari Si Szinpin bilan Janubiy Koreyada uchrashuvidan oldin e'lon qilingan bo'lib, unga qo'shimcha geosiyosiy ahamiyat yuklamoqda.

Prezident administratsiyasi sinovlarning joylashuvi va jadvali haqidagi batafsil ma'lumotlar keyinchalik Vashington tomonidan e'lon qilinishini bildirdi. “Zamin”ni Telegramʻda oʻqing!