Fransiyada bir necha oydan buyon davom etayotgan muhim huquqiy jarayonlar yana bir burilish nuqtasiga keldi. Bloomberg nashri yozganiga ko‘ra, Telegram asoschisi Pavel Durovga nisbatan qo‘llanilgan harakatlanish cheklovlari 10-noyabrdan boshlab to‘liq bekor qilindi. Bu qaror Fransiya hududini tark etishni taqiqlashni ham, politsiyaga muntazam borib qayddan o‘tish talabini ham butunlay o‘chirib tashladi.
Demak, endi Durov mamlakatni sud organlarini oldindan xabardor qilmasdan erkin tark etishi mumkin. AFP manbasining qayd etishicha, Durov avvalgi sud nazorati talablariga mukammal amal qilgani uchun cheklovlar beparvo holatda emas, balki uning mas’uliyatli munosabati asosida bekor qilingan.
Ma’lumki, ushbu cheklovlar Fransiya tergov organlari tomonidan Telegram platformasi faoliyati yuzasidan boshlangan tergov bilan bog‘liq edi. Tergovchilar platformani noqonuniy kontent tarqatilishiga sharoit yaratish, ayrim jinoiy guruhlar faoliyatini muvofiqlashtirishga imkoniyat berish hamda moderatsiya qoidalariga to‘liq amal qilmaslikda gumonlagan. Ayni paytda ham ushbu tergov rasman yakunlanmagan va ish yuritilishi davom etmoqda.
Durovga nisbatan sud nazorati 2025-yil boshlarida kuchaytirilgan edi: unga Fransiyani tark etish man qilingan, shuningdek, politsiyaga majburiy ravishda borib qayddan o‘tish talabi yuklatilgan. Yoz faslida bu choralar biroz yumshatilgan — qisqa sayohatlarga cheklangan ruxsat berilgan, ammo to‘la erkin harakatlanish huquqi tiklanmagandi.
Endilikda esa vaziyat tubdan o‘zgardi: barcha cheklovlar asosli tarzda bekor qilindi. Shu bilan birga, Durovning o‘zi ham, Fransiya rasmiylari ham bu vaziyat yuzasidan hozircha ommaviy bayonot bermagan.
Taxlilchilar fikricha, ushbu qaror tergov jarayonidagi yangi dinamika, qo‘shimcha dalillar yoki ayblovlar xususidagi aniqliklar bilan bog‘liq bo‘lishi mumkin. Biroq aniq xulosa chiqarish uchun rasmiy izohlar kutilmoqda.
Mazkur voqea Yevropadagi raqamli xavfsizlik, platformalar mas’uliyati va internet erkinligi atrofidagi global bahslarga yana bir marta diqqat qaratishga sabab bo‘ldi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
