Hindistonda 45 yil avval bedarak yo‘qolgan erkak kutilmaganda oilasi bilan qayta uchrashdi. Bu haqda “Times of India” xabar berdi.
Ma’lumotlarga ko‘ra, Rikhi nomi bilan tanilgan erkak Himachal-Pradeshning Sirmaur tumanidagi Nadi qishlog‘ida tug‘ilgan. U 1980 yilda uyidan chiqib ketgach, Haranada mehmonxonada ish boshlagan, ammo o‘sha yili yo‘l-transport halokatiga uchrab, bosh miya jarohati tufayli xotirasini yo‘qotib qo‘ygan.
Ota-onasi uni halok bo‘ldi deb o‘ylab, qaytib kelishiga umid qilmagan. Shundan keyin Rikhi Mumbayga ketib, Ravi Chaudhary nomi bilan yangi hayot boshlagan, uylanib oila qurgan va o‘tmishini butunlay unutgan.
Bir necha oy oldin yana jarohat olgach, uning bolalik xotiralari qayta jonlana boshlagan. Xotinining yordami bilan u o‘zining asl kelib chiqishini aniqlab, tug‘ilgan qishlog‘ini topishga muvaffaq bo‘lgan.
15 noyabr kuni erkak 1600 kilometr yo‘l bosib Nadi qishlog‘iga qaytdi va 45 yildan beri ko‘rmagan aka-ukalari, opa-singillari bilan ko‘rishdi.
Bu voqea Hindistonda katta hayrat va ehtirom bilan qarshi olinmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
