Rossiya Aloqa, axborot texnologiyalari va ommaviy axborot vositalarini nazorat qilish bo‘yicha federal xizmati (Roskomnadzor) Snapchat messenjeriga qarshi harakatni boshladi va servisni blokladi. Bu haqda RBK xabar tarqatdi.
Roskomnadzorning tushuntirishicha, ayni paytdagi axborotlarga ko‘ra, Snapchat servisi Rossiyada terrorizmga aloqador harakatlarni tashkil etish, ularni amalga oshirish, terroristik tashkilotlarga yollash va boshqa jinoyatlarni sodir etish uchun qo‘llanilayotgani aniqlangan. Shu bilan birga, mazkur platformada ma’lumotlarning tarqalishi, boshqa davlatlarga qarshi turli xil jinoyatlarning sodir etilishi ehtimoli xavfli bo‘lib, bu bilan aloqada bo‘lgan shaxslar ham aniqlangan.
Snapchat messenjeri 2011-yilda Stenford universiteti talabalari Evan Shpigel, Frenk Braun va Bobbi Merfi tomonidan ishlab chiqilgan. Ushbu platforma, foydalanuvchilarga suratlar, xabarlar va videolarni qisqa vaqtda yo‘q bo‘lib ketishi mumkin bo‘lgan holda almashish imkonini bergani bilan mashhur. Snapchat’ning ommaviy bo‘lishida eng muhim omillardan biri — u foydalanuvchilarga ko‘rinishini o‘zgartiradigan filtrlar va maskalarni taklif etdi. Shuningdek, "hikoyalar" funksiyasi ham birinchi marta aynan Snapchat’da paydo bo‘lgan.
2017-yilda Snap Inc. kompaniyasining ommaviy savdoga chiqarilishi natijasida, Snapchat Nyu-York fond birjasida 25 milliard dollarga baholangan. Servisning 2025-yilga kelib, oylik foydalanuvchilari 943 million kishiga yetishi kutilmoqda.
Eslatib o‘tamiz, avvaliga WhatsApp messenjeri ham Rossiya qonunchiligiga muvofiqlashmaslik sababli bloklanishi mumkinligi haqida ma’lumot berilgan edi. Ushbu holatlar Rossiyadagi axborot va aloqa tizimlari nazoratini yanada kuchaytirishga olib kelmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
