AQSHda migratsiya siyosati atrofidagi vaziyat yana bir bor keskinlashdi. CBS telekanali keltirgan ma’lumotlarga ko‘ra, 15 yanvar holatiga AQSH immigratsiya va bojxona xizmati (ICE) butun mamlakat bo‘ylab deportatsiya qilinishi mumkin bo‘lgan 73 ming nafar migrantni ushlab turibdi. Bu ko‘rsatkich idora tarixidagi eng yuqori daraja sifatida qayd etilmoqda.
Telekanal ta’kidlashicha, ICE 23 yillik faoliyati davomida birinchi marta ushlab turilganlar soni 70 mingdan oshdi. Shu bilan birga, ushlanganlarning katta qismi yolg‘iz kattalar ekani aytilgan: taxminan 67 ming nafar. Qolgan 6 ming nafar atrofidagi qismi esa voyaga yetmagan farzandlari bor oilalar hisoblanadi.
Eng ko‘p muhokamaga sabab bo‘layotgan jihat — ushlanganlar orasida jinoyat ishi bilan bog‘liq holatlar ulushi. CBS ma’lumotida keltirilishicha, 34 mingga yaqin shaxs jinoyatda ayblangan yoki ilgari sudlanganlar qatoriga kiritilgan.
Bu ortiqcha bosim ICE tizimining imkoniyatlari haqida ham savollarni ko‘paytiryapti. Chunki bunday katta miqdordagi ushlab turish nafaqat huquqiy jarayonlarni, balki infratuzilma, moliya va xavfsizlikni ham qattiq sinab qo‘yadi.
Ayni paytda deportatsiya statistikasi bo‘yicha ham bahslar bor. Ayrim rasmiy bayonotlarda o‘tgan yili “2,5 milliondan ortiq” migrant mamlakatdan chiqarilgani aytilgan, ammo bu raqam qanday hisoblangani yuzasidan mustaqil tahlilchilar turlicha fikr bildirmoqda — kimdir bu yerda “deportatsiya” va “o‘z xohishi bilan ketish” ko‘rsatkichlari aralash ketganini ta’kidlaydi.
Qisqasi, raqamlar katta, shovqin yana kattaroq. Va bu tendensiya davom etsa, AQSHda migratsiya masalasi 2026 yilda ham eng qizg‘in siyosiy “front”lardan biri bo‘lib qolishi aniq.
“Zamin”ni Telegramʻda oʻqing!
