Checheniston rahbari Ramzan Qodirov o‘zining Telegram-kanali orqali o‘g‘li — respublika Xavfsizlik kengashi kotibi Adam Qodirov ishtirokida kuch tuzilmalari komandirlari bilan o‘tkazilgan yig‘ilishdan videolavhani e’lon qildi.
Qodirovning yozishicha, mazkur uchrashuvda respublikada bo‘lib o‘tadigan saylovlarga tayyorgarlik ko‘rish, saylov jarayonida xavfsizlikni ta’minlash, shuningdek ekstremizmga qarshi kurashishga oid masalalar muhokama qilingan.
Ramzan Qodirov ta’kidlashicha, yig‘ilish davomida Adam Qodirov huquq-tartibot organlari va turli muassasalar o‘rtasidagi hamkorlikni yanada mustahkamlash zarurligiga alohida urg‘u bergan. Shuningdek, saylovlar vaqtida xavfsizlikni ta’minlash ustuvor vazifalardan biri sifatida belgilangani qayd etilgan.
Bundan tashqari, Qodirovning ma’lum qilishicha, Adam Qodirovga Zaporijjya AESni qo‘riqlash va xavfsizligini ta’minlashga qo‘shgan hissasi uchun “Atom stansiyalari xavfsizligini oshirishdagi xizmatlari uchun” medali topshirilgan.
Eslatib o‘tamiz, bundan avval ijtimoiy tarmoqlarda Adam Qodirov Grozniydagi yo‘l-transport hodisasidan keyin og‘ir ahvolda shifoxonaga yotqizilgani va uni Moskvaga olib ketishga tayyorgarlik ko‘rilayotgani haqida turli xabarlar tarqalgan edi.
“Zamin”ni Telegramʻda oʻqing!
