Bolgariya prezidenti Rumen Radev iste’foga chiqish niyati borligini ochiq e’lon qildi. Dushanba, 19 yanvar kechqurun u xalqqa televizion murojaat bilan chiqib, bu chiqishini “mamlakat prezidenti sifatida so‘nggi murojaat” deb atadi. Davlat rahbari o‘z so‘zlarida 20 yanvar kuni iste’fo to‘g‘risidagi arizani rasman topshirishini ma’lum qildi.
Rasmiy tartibga ko‘ra, prezidentning iste’fo haqidagi iltimosi Konstitutsiyaviy sudda ko‘rib chiqilishi kerak. Sud qaror chiqarguncha Radev o‘z vakolatlari doirasida ishlashni davom ettiradi. Agar iste’fo qabul qilinsa, prezidentlik vazifalari vitse-prezident Iliyana Yotovaga o‘tadi.
Radev murojaatida Yotova haqida alohida to‘xtalib, uni “prezident vazifasini munosib ado etuvchi” sifatida ko‘rishini bildirdi va unga ishonch bildirdi. Davlat rahbari jamiyatga ham ruhiy chaqiriq bilan murojaat qildi: oldinda mamlakat kelajagi uchun javobgarlik va kurash turganini ta’kidlab, bu yo‘lda “munosib, ruhlantirilgan va sobitqadam insonlar” bilan birga bo‘lishga ishonishini aytdi.
Ma’lumot o‘rnida, Rumen Radev 2017 yildan beri Bolgariya prezidentligi lavozimini ketma-ket ikki muddat davomida egallab kelayotgan edi. Uning iste’fo haqidagi bayonoti esa mamlakatda dekabr oyidan beri kuchaygan norozilik namoyishlari fonida yangradi.
Namoyishlarning avj olishiga ijtimoiy tarmoqlarda tarqalgan bir nechta videolar sabab bo‘lgani aytilmoqda. Ulardan birida hukmron koalitsiya deputatlari “Lukoyl”ning mahalliy aktivlari bilan bog‘liq qonunni atigi 26 soniya ichida qabul qilgani aks etgan. Yana bir video esa tushlik tanaffusida o‘tgan, bahsli byudjet loyihasi bo‘yicha ovoz berish jarayonini ko‘rsatgan. Mazkur holatlar jamoatchilikda “qonunchilik tezkorligi” ortida shaffoflik yo‘qolayapti, degan e’tirozlarni yanada kuchaytirgan.
Eslatib o‘tamiz, 11 dekabr kuni namoyishlar eng yuqori nuqtaga chiqqan paytda Bolgariya bosh vaziri Rosen Jelyazkov iste’foga chiqqan edi. Shu ortiqcha bosim va siyosiy keskinlik muhitida mahalliy OAV Radevning prezidentlikdan ketishi ortida yana bir ehtimoliy reja borligi haqida yozmoqda: u o‘z siyosiy partiyasini tuzishi va shu yil o‘tishi kerak bo‘lgan muddatidan oldingi parlament saylovlarida ishtirok etishi mumkin.
Qisqasi, Bolgariyadagi siyosiy sahna yana bir katta burilish ostonasida. Agar iste’fo tasdiqlansa, vitse-prezident Yotova davlat rahbarligi vazifalarini qo‘lga oladi, mamlakat esa namoyishlar va ehtimoliy saylovlar fonida yangi bosqichga kirib boradi.
“Zamin”ni Telegramʻda oʻqing!
