AQSH Davlat kotibi Marko Rubio Senatdagi tinglovda Qo‘shma Shtatlar va Yevropa ittifoqchilari Ukraina uchun xavfsizlik kafolatlari bo‘yicha umumiy tushunishga kelganini bildirdi. Uning ta’kidlashicha, amaldagi “kafolat paketi” ikki tayanchga suyanadi: Yevropaning cheklangan kontingenti va AQSHning xavfsizlik bo‘yicha qo‘shimcha kafolati.
Rubio gapni ochiq qildi: bu kontingent, avvalo, Fransiya va Britaniya qo‘shinlariga tayanadi, AQSH esa “qayerdadir orqa fonda” turib, umumiy xavfsizlikni kafolatlash vazifasini bajaradi. Ya’ni, ssenariy shunday — Yevropa maydonda, Amerika esa “suyanch nuqta” sifatida.
Shu bilan birga, davlat kotibi Yevropaning urushdan keyin Ukrainaga qo‘shin joylashtirish istagini tanqid qilmasligini aytdi. Lekin bir narsani qat’iy urg‘uladi: AQSH ko‘magisiz bu maqsadni amaliy va maqbul ko‘rinishda ta’minlash juda qiyin.
Rubioning fikricha, muammo faqat Ukrainada emas — umumiy xavfsizlik arxitekturasida. U Yevropa davlatlari hozircha AQSH yordamisiz “to‘liq mustaqil” holatda yashay olmasligini, bunga sabab sifatida esa so‘nggi 20–30 yilda mudofaa xarajatlariga yetarlicha mablag‘ ajratilmaganini ko‘rsatdi.
Xulosa shunday: Rubio aytayotgan modelda Yevropa mas’uliyatni ko‘proq o‘z zimmasiga oladi, ammo Vashingtonning kafolatisiz bu sxema ishonchli “qalqon”ga aylanmaydi. Endilikda asosiy savol bitta — bu umumiy kelishuv qayergacha konkretlashadi: qay darajadagi qo‘shin, qay format, qay muddat va qay shartlar asosida.
“Zamin”ni Telegramʻda oʻqing!
