14 fevral kuni “Tolibon” nazoratchilari Qobul va Hirot shaharlarida Valentin kuni bilan bog‘liq savdo va bezaklarga to‘sqinlik qilgani xabar qilindi. Xususan, Hirotda ayrim gul do‘konlari eshiklariga “Valentin taqiqlanadi” mazmunidagi yozuvlar yopishtirilgani, Qobulda esa sotuvchilarga qizil atirgul, tabrik kartalari hamda qizil rangdagi bezaklarni sotmaslik bo‘yicha ogohlantirish berilgani aytilmoqda.
Tolibon ma’muriyati vakillari bu bayramni “islomiy qadriyatlarga mos kelmaydigan” odat sifatida baholamoqda. Xususan, “Fazilatni targ‘ib qilish va yomonlikdan qaytarish” vazirligi vakili Valentin kunini “axloqiy tanazzul” deb atab, uni G‘arbga taqlid sifatida ko‘rishini bildirgan.
Hozircha qoidabuzarlarga nisbatan qanday aniq choralar qo‘llanishi haqida rasmiy tartib va jazo mexanizmi ochiq aytilmagan. Shunday bo‘lsa-da, kuzatuvchilar bu kabi cheklovlar avvalo savdo nuqtalari va yoshlar orasidagi “ramziy” bayramona an’analarga bosimni kuchaytirishini ta’kidlaydi: ya’ni bayramning o‘zi emas, uning atributlari nishonga olinmoqda.
“Zamin”ni Telegramʻda oʻqing!
